رضا عبدالعال: «مصر خسرتني في التدريب والتحليل.. وبيقولوا إني بضحك الناس»

أكد رضا عبدالعال نجم الزمالك والأهلي السابق، أن البوركيني بلاتي توريه، لاعب خط وسط الفريق الأول لكرة القدم بنادي بيراميدز، أفضل من نبيل عماد «دونجا»، لاعب وسط الزمالك.
كان الزمالك تعاقد مع «دونجا»، في الميركاتو الصيفي الماضي، قادمًا من نادي بيراميدز في صفقة وصلت إلى 20 مليون جنيه.
وقال رضا عبدالعال خلال حواره ببرنامج «اللعيب»، المذاع عبر فضائية «ام بي سي مصر»: «كنت أتمنى أن يتعاقد الزمالك مع توريه بدلًا من دونجا، كان سيكون إضافة قوية لخط وسط الزمالك، إنما دونجا (مبطل)».
وأضاف: «بلاتي توريه، لاعيب برشلوني، ده كان بيلاعب الأهلي والزمالك وهو ديفندر لواحده، وهما بيلعبوا بثلاثة ديفندرات، شوفتوا الخيبة بتاعتنا والمدربين اللي مسكين الأهلي والزمالك».
وتابع: «مصر خسرتني.. مصر خسرتني في التدريب وفي التحليل، محدش بينفذ اللي بقوله عشان مش فاهمين اللي أنا بقوله».
وأكمل: «بيقولوا اني بطلع بضحك الناس، أنا عمري ما قولت حاجة وطلعت غلط، هما اللي مبيفهموش أنا مالي».