«استحملنا كتير.. وانتوا مش بتلاعبوا ريال مدريد».. خالد الغندور يوجه رسائل نارية للاعبي الزمالك

وجه الإعلامي خالد الغندور، رسائل نارية للاعبي الفريق الأول لكرة القدم بنادي الزمالك، وذلك بسبب تراجع النتائج في الفترة الأخيرة.
وقال خالد الغندور في تصريحات تليفزيونية عبر فضائية «الزمالك»: «الفترة اللي جاية محتاجين رجالة في الملعب، يمكن أي ظروف بيمر بيها نادي الزمالك، لازم اللعيبة تخرج نفسها من الظروف دي لأنها بتلعب كورة ومعظمهم مأمنين مستقبلهم، أنت بتلعب كورة عشان أنت بتحب الكورة فبتكسب فلوس، لو أنت بتلعب كورة عشان الفلوس يبقى الوضع مختلف تمامًا».
وأضاف: «لاعيب الكورة لازم وهو بيلعب يبقى مستمتع بكرة القدم يبقى مبسوط وهو نازل يلعب مباراة، عاوز يقول للناس أنه لاعيب كبير، ده لازم يكون موجود في الملعب الفترة الجاية».
وأكمل: «كرة القدم مش لعبة فردية، مقدرش أتألق لوحدي، لازم الفرقة كلها تتألق وتشتغل على قلب رجل واحد، وتكسب المباراة باللعب الجماعي وليس باللعب الفردي».
وتابع: «احنا زعلانين من اللعيبة أوي، أول مرة أبقى زعلان من مستر فيريرا، بعد الأداء الذي ظهر عليه الفريق الفترة الماضية، لازم اللعيبة والجهاز الفني يصالحوا الجمهور الفترة الجاية، لأن الجمهور استحمل كتير جدًا في أخر شهرين».
وواصل: «أنت بتلعب في نادي الزمالك نادي كبير، لازم يبقى عندك ثقة في قدراتك، أنت مش بتلاعب ريال مدريد ولا بتلاعب برشلونة ولا ليفربول ولا باريس سان جيرمان، أنت بتلاعب فرق من المفترض أنهم أقل منك، ومعظم لاعبيهم لا يلعبون في منتخبات بلادهم».