«مش عارفين نتكلم مع مين».. زيزو يكشف أصعب موقف في سنة الفوز بالدوري

أعرب أحمد سيد «زيزو» جناح الفريق الأول لكرة القدم بنادي الزمالك، عن سعادته البالغة لتتويج فريقه ببطولة الدوري الممتاز للمرة الرابعة عشرة في تاريخه.
وقال «زيزو» خلال حواره مع برنامج «الحكاية» المذاع عبر فضائية «ام بي سي مصر»: «أعلم مدى فرحة جمهور نادي الزمالك بعد التتويج ببطولة الدوري، لأن أنا قبل ما أكون لاعب في نادي الزمالك، أنا واحد من مشجعي النادي، بالتأكيد وصلي إحساس الجمهور لأن أنا واحد منهم.. الحمدالله الموسم كان صعب وعدى على خير».
وأوضح: «واجهنا ظروف صعبة منذ الموسم الماضي، الناس مش عارفة الكواليس من داخل النادي، الناس بتشوف إن اللاعيبة ممكن تكون مش بتاخد فلوس، ولكن جوه النادي محدش عارف الكواليس غير الناس الموجودة واللاعبين، احنا مرينا بظروف ميستحملهاش أي نادي في العالم وميستحملهاش أي لاعيبة في العالم، ولكن لأن لاعيبة الزمالك رجالة ويحبوا بعض بجد، عشان كدة قدرنا نتغلب على تلك الظروف الصعبة».
وواصل: «احنا كنا كل شهر أو شهرين يتم تعيين مجلس إدارة جديد، والمجلس جديد يرفض حل المشكلة القديمة ويقولنا أنا جاي أبدأ من جديد ثم يتم تغيير المجلس، واحنا مش عارفين نتكلم مع مين».