خالد الغندور: «الأهلي مش في دماغه كهربا.. واللاعب صعبان عليا»

علق الإعلامى خالد الغندور، على أزمة محمود عبدالمنعم «كهربا»، جناح الفريق الأول لكرة القدم بالنادي الأهلي.
كانت المحكمة الرياضية الدولية «كاس» قضت بتغريم كهربا مليونى دولار، إضافة إلى 5% فوائد على المبلغ، اعتبارًا من 20 يونيو 2019 حتى تاريخ السداد الكامل لمبلغ الغرامة. وتلقى نادي الزمالك، في شهر يوليو الماضي، إخطارًا من المحكمة الرياضية الدولية بإيقاف كهربا 6 أشهر لحين سداد مستحقات الزمالك.
ورفضت إدارة نادى الزمالك، برئاسة المستشار مرتضى منصور، طلب محامى محمود كهربا بتخفيض قيمة الغرامة الموقعة على اللاعب أو تقسيطها.
وقال خالد الغندور، في تصريحات تليفزيونية عبر فضائية «الزمالك»: «كهربا، كان نجم نادي الزمالك، هرب واتعمله خطة للهروب، وأنا والله اللاعب صعبان عليا، مش صعبان عليا من منطلق اللي هو عمله في الزمالك يستاهل اللي حصله».
وأضاف: «ممكن يكون حد لعب في دماغ كهربا، ولكن في النهاية لاعيب هيعتزل كرة القدم وأنا دايمًا بحب اللاعيب يلعب وبحب اللاعيب يتألق ويثبت ذاته ولكن لا يلومن إلا نفسه، لاعيب كان مرتبط بعلاقة طيبة مع نادي الزمالك وقدم مباريات رائعة مع الفريق وانضم لمنتخب مصر وتوج ببطولات مع الزمالك وكان لاعيب مؤثر، دلوقتي كهربا، قاعد في البيت والنادي الأهلي مش في دماغه كهربا، خالص، أنا في دماغي المدرب الأجنبي اللي مشي بعد ربع ساعة، بيرسي تاو وميكيسوني هعمل معاهم إيه، طيب هنجيب الفلوس للناس دي وندفع الشروط الجزئية وندفع للاعيبة باقي عقودهم ونجيب لاعيبة جديدة عشان نسكت الجمهور، ولكن كهربا خلاص (لعبة واتحرقت) مش هتعملنا بروباجندا خلاص انتهت للأسف».