رامي جمال يوجه رسالة للنقاش : «كفاية برامج لو سمحت» (فيديو)

شارك الفنان رامي جمال فيديو له عبر حسابه الشخصي بموقع تبادل الصور والفيديوهات «إنستجرام»، كشف عن سبب مساعدته للشاب أحمد سالم النقاش .
وقال الفنان رامي جمال خلال الفيديو الذي شاركه: «أنا عايز أتكلم عن القبول إللى ربنا كاتبه للفنان أحمد سالم، أحمد فنان لدرجة مشوفتهاش في حياتي كتير، أحمد انا شايف القبول اللي ربنا كاتبه والحب اللي انتوا حبيتوه ليه دي حاجة مبتحصلش كل يوم، أنا فرحان جدا إن مازال الصوت الحلو والفن الحقيقي الناس بتحبه وتدعمه».
وأضاف: «أنا مش بساعد أحمد أنا بساعد نفسي كفنان وملحن ومطرب، وإن الوسط الفني لما يكون فيه فنانين وأصوات زي أحمد بترتقي بالذوق العام ودي حاجة محتاجينها كلنا، أنا اتربيت في بيت أهلى إن الفرصة لما بتيجي لحد بتبان إنها ربنا باعتها، احنا كلنا أسباب لبعض وممكن أنا أحاول أسهل على أحمد مشواره في الفن ودي حاجة بنسبالي قمة في السعادة».
واستكمل: «في ناس بتقولي إنت بتساعد أحمد عشان التريند، والله عمرها ما كانت شخصيتي ولا هتكون شخصيتى، مفيش حد ضامن وهو بيحاول يعمل حاجة وهو نيته مش صافية إنها في الآخر هتوصله للنتيجة اللي هو عايزها، الناس اللي بتقولي كده أكيد موهوبين وأكيد شايفين الفرصة اللي ربنا إداها لأحمد أو القبول هو يستحقه بس والله بطمنكم كل واحد جاي ليه الفرصة الرزق من ربنا بمعاد حاولوا، اللي أحمد عملو في الآخر فيديوعادي جدا وهو بيشتغل، راجل نقي وسيد الرجالة وبعد سنة ونص الفيديو انتشر».
واختتم رامي جمال رسالته: «عايز أقول لكل الناس اللي ماخدتش الفرصة ربنا يديكم أكتر من اللي بتتمنوه، جاي لرزقكم معاد، وإن شاء الله لو ربنا كرمني في موضوع أحمد دي حاجة هتشجعني أنا ك رامي وكل الفنانين، أنا عايز أشكر كل الفنانين وشركات الإنتاج اللي كلموني، وبشكر كل الناس على اللي عملته مع أحمد، وأنا بالنسبالي لسه معملتش حاجة، أنا بعمل لنفسي عند ربنا، اللي بيسهل لحد حاجة هلاقي مليون يسهله حاجات تانية، ربنا يكتبله الخير وإن شاء الله الفترة الجاية هيبقى في مفاجآت كتير، وبوجه رسالة لأحمد وبقول كفاية برامج يا أحمد لو سمحت لحد ما نخلص الأغاني» .
View this post on Instagram
A post shared by Ramy Gamal (@ramygamalmusic)