«ورقنا سليم ومعندناش غلط»..مدير أعمال «عنبه» يرد على تسريبات حمو بيكا

رد «ديابلو» مدير أعمال مطرب الراب عنبة على تسريبات حمو بيكا التي انتشرت في ساعة متأخرة من مساء أمس الإثنين حول تزوير عنبة لأوراق التحاقه بنقابة الموسيقيين، بالإضافة إلى دفعة رشاوي مالية لأحد مسؤولي النقابة للهدف ذاته.
وقال مدير أعمال عنبة في تصريحات ل«المصري اليوم»: «احنا كل حاجة لينا سليمة، وواخدين إعفاء من الجيش، ومعندناش أي مشاكل مع أي حد، وملناش علاقة بأي كلام بيتقال أو حد بيحطنا في جملة مفيدة عشان خاطر يخرب الدنيا على الكل، ربنا اللي بيقسم الأرازق وبيرزق البني آدم القريب من ربنا سبحانه وتعالى.. ورقنا سليم ومعندناش ورق غلط».
وتابع «ديابلو»: «احنا مش هنرد على حد ومش هنعمل سعر لحد، عنبة اتوقف عن الغناء 8 شهور ماطلعش مرة لايف قال كلمة على النقابة ولا عاب في حد ولا قال اشمعنا ده، وعنبة حاصل على معهد دراسات نوعية من مصر الجديدة، وواخد اإعفاء سنة من الجيش لأن أخوه في الجيش، ولما تقدم بأوراقه للنقابة كشفوا عن الورق لمدة 4 أيام وبعدين قبلوه».
وأضاف مدير أعمال عنبة: «حمو بيكا بيعمل حفلات في كل دول العالم وبيجيلو هدايا دهب وعنبه عمره ما طلع قال اشمعنا هو، ليه بقا من يوم ما عنبه أخد كارنيه النقابة والكل يقول اشمعنا هو، وكل أزمة يحطوا اسمه فيها، عنبه مصنف راب مش مهرجانات، يعني بعيد عن ازمة حمو بيكا وزملائه، ليه بقا بيحطونا في أي أزمة».
وأشار مدير اعمال عنبة أن المغني لن يرد على هذه التسريبات، لأنه مشغول بفنه، وبأعماله التي يجهز لها، فهو يغني من أجل الفن، وليس سبوبة كما يتخذه البعض.
وظهرت أمس تسريبات صوتية لمكالمة بين حمو بيكا وشخص مجهول، يتهم خلالها الموسيقار «أ. ر»، المسؤول في نقابة المهن الموسيقية بالحصول على رشوة من أكثر من مطرب مهرجانات من أجل قيده بنقابة الموسيقيين، من بينهم عنبة وتيخا.
قال حمو بيكا في التسريب موجهًا حديثه لشخص مجهول: «أ. ر طالع في فيديو بيقول عنبة مقدم ورق مزور وشهادة جيش مزورة، وبعدها بأسبوع إداله كارنيه النقابة، ومعايا فيديو وصور وهو متصور في مكتبه وبيديله الكارنيه».
وأضاف حمو بيكا في المكالمة المسجلة: «معايا نور التوت عايزين يدفعوه 20 ألفًا، وتيخا دافع 20 ألفًا» وردًا على سؤال الشخص الذي يحدثه عن كيفية معرفته بهذا الحديث قال: «إسلام على دافع الفلوس أول ما أحد الكارنيه قاللي أنا رايح أدفع للنقابة 15 ألف جنيه، وعاوزينه يجدد تاني يدفع 15 ألف جنيه تاني، وما أخدش إيصال بالفلوس اللي دفعها».
تابع بيكا: «أنا اشتغلت 15 أو 16 أوردر في الساحل كنت بدفع إيصالات، الناس دي ما ادتنيش ولا إيصال، كنت بدفع 15 ألف جنيه، وكانوا بيبعتوا زينهم علطول يحصل الفلوس، وكان بياخد الفلوس مني أنا ساعات، ومن المحل اللي هغني فيه ساعات، ما كنتش بطلع ياريس غير لما المحل يدفع الفلوس، يا إما أنا أدفع الفلوس، والإيصال المفروض يجي للمطرب مش للمحل».
واصل حمو بيكا: «إذا كان أنا اللي كنت بقوله أنا شغال في الحتة الفلانية، يقوللي هات الفلوس قبل ما تطلع، أكلم الناس أقولهم أدوله الفلوس، مش عايز يطلعني لما ياخد الفلوس، ولما جه حلمي قاله هات الإيصالات قاله هبعتهالك وبعد كده مابعتلوش حاجه، ونزلوني أوردرين، أورد في القاهرة وأوردر في الإسكندرية وماخدتش فيهم أجري».
وتحدث عن الموسيقار «أ. ر» قائلا: «و(أ. ر) خلاني روحت مضيت على عقد بتاع فيلم مكتوب في العقد إن المفروض آخد نص المبلغ 250 ألف وما أخدتش ولا جنيه، وأخدني وداني البيت بيتك، تمثيلية البيت بيتك دي، صورت فيها وعملت فيها كل حاجه وما أخدتش برضه أجري» وردا على سؤال من يهاتفه إن كان الأجر دفعته جهة الإنتاج أم لا قال: «أيوه الأجر اتاخد آه، الناس كانوا عاطيينه ظرفًا، عطاني من الظرف ده 10 آلاف جنيه بس، وأنا أجري 70 ألف جنيه، وجم صوروا عندي في الاستوديو».