«مبسوط بالقرار».. مخرج مسلسل منى زكي يعلق على خروجه من سباق رمضان 2022

بعد خروج مسلسله «لام شمسية» من سباق رمضان 2022، والذي تلعب بطولته النجمة منى زكي، علق المخرج كريم الشناوي: «بعد خبر تأجيل المسلسل، جالي تليفونات ورسائل كتير لاصدقاء بيطمنوا وبيدعموا القرار، أنا بس حابب اوضح إني مبسوط بالقرار وممتن لكل الشركاء في العمل اللي حطوا مصلحة المشروع قبل مصلحتهم من أول المنتج وشركة الانتاج والأساتذة الممثلين والأساتذة رؤساء الأقسام وكل الشركاء في العمل اللي بذلوا مجهود كبير في الفترة اللي فاتت، ولسه عندهم الحماس لبذل مجهود أكبر لما نستكمل العمل، احنا عمرنا ما بنضمن النتيجة ، لكن دورنا نوفر أفضل ظروف ممكنة للشغل والحقيقة دي القناعة اللي عند كل فريق العمل ودي حاجة تفرح جدا».
وتابع كريم الشناوي عبر حسابه الرسمي على فيسبوك:: «حابب كمان أشكر فريق الإخراج اللي أنا حقيقي محظوظ إني بشتغل معاهم واللي كانوا شريك أساسي في كل نجاح حققنا قبل كده وامبارح كنت ممتن جدا انهم حولوا قرار صعب زي ده لقرار سهل ومفهوم ومنطقي حتى لو بيلخبط حساباتهم الشخصية، ودي حاجة بتؤكد فخري واعتزازي بفريق الإخراج اللي بشتغل وسطهم».
واختتم كريم الشناوي: «حاجة أخيرة وشخصية، امبارح كانت الذكري السنوية الأولي لوفاة عمتى مها الشناوي، وقعدت افتكر كل الكلام اللي كانت بتحكيهولي عن الصناعة وإزاي هنفضل طول الوقت قدام خيارات صعبة ولازم نقدر عليها وفي نفس الوقت نحافظ على شغفنا للشغل اللي بنعمله، فكنت مبسوط إنها حاضرة ومؤثرة في يوم زي امبارح».
وشارك المخرج كريم الشناوي رمضان الماضي بمسلسل «خللي بالك من زيزي» للفنانة أمينة خليل والذي حقق نجاحات فنية وجماهيرية كبيرة.
وجاء تأجيل مسلسل «لام شمسية» للمخرج كريم الشناوي وبطولة النجمة منى زكي، بسبب مشاركة بعض الفنيين الأجانب والحاجة إلى السفر خارج مصر لتصويره، وهو ماأصبح صعبا مع قيود إجراءات كورونا، مادفع صناعه لاتخاذ قرار تأجيل تصويره، حتى يأخذ وقته في التصوير وتنفيذ مشاهده.