«عيب تغلط في زمايلك».. عزيز الشافعي يهاجم عمرو مصطفى

علق الملحن الموسيقى عزيز الشافعي على ما كتبه عمرو مصطفى أمس على حسابه الشخصي على «فيس بوك»، واصفا ما قاله مصطفى بالإهانة غير المقبولة لزملائه بالوسط الفني.
قال عزيز الشافعي في تصريحات خاصة ل «المصري اليوم»: «مش من حقه ولا من أخلاق المهنة، أنه يكرر إهاناته لزملائه كل فترة عشان يبقى تريند، سكتنا كتير لكن لازم حد يقوله عيب تغلط في الفنانين اللي على الساحة كلهم وتتهمهم بالفشل».
وأضاف الشافعي: «عمرو عنده عنده تاريخ محترم ولازم يحترم زملائه زي ما بنحترمه، وهو جزء من السوق وشغال وبينزل شغل بصفة مستمرة، فلو فيه فشل زي ما بيقول هيبقى هو جزء منه».
وتابع: «الجيل اللي بيتهمه بالفشل (زور) ده جيل فيه عمالقة ومبدعين مصريين شغلهم ناجح في الوطن العربي كله، جيل فيه وليد سعد ورحيم وتامرعلي وخالد عز ومحمد يحي ومدين وإيهاب عبدالواحد خيامي وبلال وغيرهم من الملحنين، ومن الشعراء أيمن بهجت قمر، وبهاء الدين محمد، أمير طعيمة، تامر حسين، نادر عبدالله، خالد تاج، محمد عاطف، صابر كمال، راؤول وغيرهم، بخلاف الموزعين الموسيقين زي طارق مدكور، توما، تميم، أحمد إبراهيم، أحمد عادل، هاني يعقوب، أسامة الهندي، وسام عبدالمنعم، على فتح الله، طارق عبدالجابر وغيرهم.. كل دول يتقال عليهم فشلوا؟».
وتساءل «الشافعي»: «نجاحات عمرو دياب في مصر والعالم العربي والعالم كله دي إيه؟.. إنت الحظ، رايقه، قدام مرايتها، زي ما إنتي، اتقل، يا أنا يا لأ، يوم تلات، أماكن السهر، والجو جميل وغيرهم اللي تصدروا المشهد الموسيقي آخر سنوات دول كانوا إيه.. نجاح ألبوم حماقي الكبير اللي حصل ده كله وتصدره التريند في 2021 ب أغلب أغانيه زي زيها مين ولو هتسيب وطالع موضه ولا ملامة وغيرهم كان ايه.. نجاح ألبومات واأغاني تامر حسني وحفلاته اللي لف بها الوطن العربي آخر كام سنة ده ممكن نسميه إيه.. نجاح رامي صبري ورامي جمال وتامر عاشور ومحمود عسيلي ومصطفى حجاج ده إيه؟».
واستكمل: «نجاح المطربات الكبيرات اللي عندنا زي أنغام وشيرين وسميرة سعيد ولطيفه وروبي ده إيه.. النجاح الكبير لأغنية (الطبطبه) ده ايه.. المطربين العرب زي الجسمي وإليسا، بلقيس، راغب، صابر، نانسي عجرم، هيفاء وهبي، وغيرهم اللي نجحوا بأغاني مبدعين مصريين دي ايه؟».
وفي نهاية تصريحاته، وجه «الشافعي» رسالة إلى عمرو مصطفى قائلا: «عيب تبقى ملحن زميل وتغلط في زمايلك اللي ناجحين وبيحاولوا يحافظوا على صورة ورونق الفن المصري رغم اللي بيحصل للذوق العام، وبدل الدراسة والتنظير والتقليل من مجهود وانجازات يشوفها الأعمى، كمل شغل وشارك زملائك في النجاح والدفاع عن الفن اللي ورثناه من أجيال عظيمة سبقتنا».
وكان عمرو مصطفى قد هاجم زملاءه من خلال منشور عبر صفحته الرسمية بموقع التواصل الاجتماعي «فسبوك»، أوضح فيه أنه خلال الفترة التي ابتعد فيها عن التلحين ظهرت موسيقى المهرجانات، وأن زملاءه غير قادرين على التصدي لهم بسبب موسيقاهم غير الرائجة مثل المهرجانات.
وأشار الملحن عمرو مصطفى في حديثه، إلى أنه سيعمل جاهدًا خلال الفترة المقبلة على تقديم أعمال جيدة ستقلب الأوضاع رأسًا على عقب، وهو الأمر الذي استفز زملاءه، وقرروا الهجوم عليه، ليعلق الفنان عزيز الشافعي عليه، قائلا: «ماهو أنت لو عرفت تكتب ذريع صح مكونتش هتشوف فشل ولا حاجة».