«مش مقتنع بيك كمطرب».. القصة الكاملة لأزمة تامر حسين مع شادي شامل

أعرب الفنان شادي شامل عن غضبه من الشاعر تامر حسين بعد حذفه أحدث أغانيه «يا معود قلبي» من موقع الفيديوهات YouTube، واتهم تامر حسين أنه وراء حذف الأغنية، إذ كتب عبر حسابه الشخصي على موقع التواصل الاجتماعي «فيس بوك»: «تامر بيدعي أني ما دتوش فلوس الأغنية مع أنه عاملي تنازل من سنتين على الأغنية في المصنفات الفنية ومختوم بختم الجمهورية وواخد أجره المادي الكامل باعتراف منه ومعترف بذلك في التنازل، وقالي بعد ما عمل التنازل الأغنية ملكك يا شادي أنت تعبت وتستاهل».
وأضاف: «بيقول عليا حرامي وإني سرقته هو عامل التنازل بكامل إرادته وكلمني وبعتلي رسايل وهو في المصنفات الفنية عشان أبعتله صورة جواز سفري وعندي بالدليل برده حظه الوحش إن كل حاجة عندي متوثقة بالدليل وكان بيجيلي الاستوديو ويشهد على ذلك الموزع مهاب سامي وتامر كان في الاستوديو بيوجهني مع إني ملحن الأغنية بس ما حبتش أكسفه ورفع عليا قضية في المحكمة الاقتصادية، بعد سنتين من التنازل ويطلب من المحكمة إلغاء التنازل والمحكمة إدته حكم بعدم الاختصاص، وهذا هو قضاء مصر المحترم ولم يصدر حكم رسمي بعدم نزول الأغنية ووقف الأغنية».
ورد تامر حسين على اتهامات شادي شامل وكتب عبر حسابه على Facebook: «الحقيقة إنى والله ما باحب أرد على بوستات المشاكل دى تماماً وعلى عينى بس قدرنا والحمد لله وعندى صحة كلامى بمسجات وواتس أب وأساتذتنا في المصنفات الفنية الزملاء المحترمين، وحاجات ما يصحش تظهر في العلن ذوقياً وكرم أخلاق منى آه والله العظيم ما خفى كان أعظم بس حاكتفى بالرد على نقطتين محتاجين توضيح المُقابل المالى وعدم اقتناعى التام بالشخص كمطرب».
وتابع: «لإن واضح أن الناس مؤخراً فاهمة البجاحة تريند أعمِل إيه عشان أكسب تعاطف الناس ؟؟؟ آه أقول دى كانت أغنيتى وكان حايدوها لمطرب كبير وكلمتين مؤثرين مُستقبلى وحرام فيتعاطف الناس اللى ماتعرفش الحقيقة والله يسامحه اللى بدعها».
وحكى تامر حسين ما حدث بينهما قائلا: «الأخ كلمنى في 2019 على كلام الأغنية اللى المفروض يغنيها (مُطرب) أو أي فنان له جماهيرية يضيف للعمل ويشهره يشهر لحن الأستاذ ويشهر كلامى ونستفاد كُلنا إن قُدر لها النجاح والجمهور حبها والحقيقة مش الأغنية دى تماما، قالى مراتى قررت تعملى الأغنية دى (للشاب خالد )وقالى إنه يغنيها الشاب خالد دويتو معاه قولتله أفيدلك تخلى الشاب خالد يغنيها لوحده لأن صوتك جنبه حايبقى على قده انت توصل اللحن أوك إنما ديو دى حاسسها تعملك مشكلة أكتر ما تفيدك وفر فلوسك، المهم دخلنا ف الجد قالى عايز التنازل عشان أطمن خالد ومراتى تتأكِد من جدية الموضوع لا تفكرنى بهزر معاها بكُل حُسن نية وذوق منى (سّبقت وخلصت) الورق المطلوب منى عشان أنقذله الموقف ويطلع صادق».
وأضاف: «فجأة بعد حماسه والشاب خالد وحلم الأحلام اللى عايز يأكده للمقربين منه اختفى لا جاب سيرة مقابل ولا خدت منه مليم والله العظيم وحياة أولادى ما خدت (منه مليم) وهيبقى عنده مليون طريقة إثبات رقم حساب بنكى أي إيصال تحويل مسج بيقولى بعتلك كذا أي أمارة حتى يقول للمدام إن فلوسها مارحتش في الهوا ويثبت صحة كلامه كل ده ماخدتش أصل التنازل فوجئت بمكتب المُصنفات وأنا براجع معاهم ورق قالولى إنه جه يطلع أصل التنازل من الصورة عشان الأصل ضاع منه طب ده حضرتك تسميه إيه (سرقة ولا نصب ولا بجاحة ولا هبل) اختاروا انتوا المُسمى المُناسب».
وأكمل: «اكتفيت إنى أعمله بلوك لكل أرقامه وفضلِ من 2019 ل 2021 لحد من 3 شهور بيوسط أي حد أعرفه وقريب منى إنه بيعتذرلى وإنه غلطان وعرف غلطته وقالهم خلونى أقابله وأنا رافض رفض تام وزمايلنا اللى وسطهم يشهدوا فضِل ورايا قد إيه ؟؟؟؟ يعتذر ويتأسِف لحد من 3 شهور كلمنى من رقم غريب رديت قالى بالنص (والنبى ماتقفل السكة في وشى أنا أسف) وغلط وعايزك تسامحنى اتحرجت وقلت عفى الله عما سلف، بس لا تكلمنى في فن ولا تبعتلى ألحان والأغنيتين تلاتة اللى عاملهم معاك انسى كلامهم قالى حاضر أنا ماشفتش منك غير كل خير وحقك عليا يا أخويا وصفحة جديدة، قابلت صديق لينا مُشترك بيقولى لسه شايف فيديو أغنيتك مع الشخص ده قولتله لاء ده أنا مش مديله تنازل بيها وكنت عامله محضر وبعتلى رسايلى أرجوك أنا صرفت اللى ورايا وقدامى ع الفيديو خليك جدع معايا وسيبهالى أسيب اللى سرقنى؟ ونصب وكدب؟ وأسيب لك ليه؟ وأنا مش مقتنع بيك كمطرب أنا فوق راسى أحلامك إنت والمدام بس ماليش علاقة بيها نفذها بشرف مش على أكتاف ناس مُحترمة، راح صور الكليب دون علمى دون دفع مقابل مادى واستحل حقوقى وقال يعنى بيحطنى قدام الأمر الواقع وهو عارف إنى والله لو كان دفعلى مال الدنيا ماكنت هشتغل معاها بعد الانطباع السيئ اللى سابهولى».