المصري كيدز: «حدوتة» الحلقة الثالثة: جزيرة الصيام

صِحى فواز وكان خلاص قرب على الجزيرة التالتة، وكان متحمس ليها جدا عشان ياخد حرف من الحروف وقعد يدعى ويقول يارب ألاقى الحرف على طول عايز أكمل المغامرة بتاعتى بسرعة وأروح على الجزيرة الرابعة وقعد يدعى كتيير ومسك المصحف وقرأ فيه ووقف عند آية بتقول «كُتب عليكم الصيام»، قال فواز أنا خلاص كبرت ولازم أصوم وأتعود على الصيام، ولما وصل الجزيرة لقى مكتوب عليها جزيرة الصيام، نزل فواز عشان يدور على الحرف بس كان عطشان وجعان ومش قادر يمشى من الحر وكل ما يقابل حد يسأله على أكل أو ميه يرد عليه ويقوله إحنا صايمين إحنا فى جزيرة الصيام لحد ما قابل كبير الجزيرة وطلب منه الأمل، رد عليه وقاله كل اللى فى الجزيرة صايمين يا فواز، قاله فواز أنا كمان نويت أصوم رمضان عشان عرفت إن ربنا فرض علينا الصيام فيه.
بس أنا كنت فى سفر وعطشان ومأكلتش ولا شربت أى حاجة من الليل، قاله كبير الجزيرة المغرب مش فاضل عليه كتير تقدر تصبر وتصوم معانا ونفطر كلنا على المغرب، قاله فواز هحاول أنا لسه بتعود على الصيام، رد عليه كبير الجزيرة وقاله أنا واثق إنك هتقدر يا فواز، وقعد فواز يصلى ويقرأ فى القرآن وكان مستنى المغرب عشان يفطر وكل ما يحس إنه خلاص مش قادر يمسك المصحف ويقرأ فيه، وعرف من المصحف إن ربنا رحيم بينا قوى وبيحبنا وإنه قال فى القرآن إن لو حد مريض أو مسافر ممكن يفطر وعرف حاجات كتير قوى كمان.
ولما أذن المغرب كانت الجزيرة كلها مستعدة للفطار مع بعض صلوا المغرب وبدأ فواز يفطر فرح بيه جدا كبير الجزيرة وقاله انت ولد شجاع وصبور قاله فواز الصيام علمنى الصبر أنا هصوم كل رمضان وهاسلى صيامى بالقرآن والصلاة ولسه فواز جاى يمشى عشان يدور على الحرف نده عليه تانى كبير الجزيرة وقاله يا فواز خد معاك الزاد هينفعك فى الطريق وكمان خد ليك حرف من الحروف، قاله فواز وهو من الفرح مبسوط أنا كدا بقى معايا تلات حروف وأخد حرف الضاد وجرى على المركب وقعد يجدف وكان مستنى السحور وهو بيغنى ويقول جايلك جايلك يا رمضان بالقرآن والصلاة جايلك جايلك يا رمضان بالصيام وحرف الضاد لحد ما راح فى النوم.