المصري كيدز: حدوتة.. جنى وهنا

جنى وهنا بنتين جيران وأصحاب في المدرسة بيحبوا بعض جدا، وعلى طول مع بعض أكتر من الإخوات، الصبح في المدرسة وبالليل في تمرين اسكواش. جنى بنوته رقيقة وطيبة، ودايما بتسمع كلام هنا عشان هي بتحبها جدا وتخاف إنها متسمعش كلامها لحسن هنا تصاحب حد تانى غيرها.
وفى يوم وهما ماشيين في النادى شافوا بنوته وقع منها فلوس كانت ماشية قدامهم، جريت جنى أخدت الفلوس عشان تلحقها وترجعها ليها. بس هنا معجبهاش الموضوع وقالت ليها إنتى هتجرى وراها.. خلاص هي مشيت إحنا ناخود الفلوس دى نشترى بيها حلويات. هنا قالت لها بس ممكن تكون هي محتاجاهم، قالت لها أكيد لا. وافقت جنى على كلام هنا كالعادة، بس المرة دى كانت حاسة إنها بتعمل حاجة غلط ومش مبسوطة، ولما راحوا على الكافيتريا مرديتش تشترى حاجة، وقالت لازم نكون عندنا أمانة ونرجع الفلوس للبنت، ضحكت هنا وقالت ليها براحتك أنا هاخود كل الفلوس وأجيب حاجات كتير وخليكى كدا قاعدة تتفرجى عليا. واشترت هنا كيس حلويات كبير وفضلت تاكل فيه ولجنى تغيظ، وبعد ما خلصت الشكولاتة كانت عطشانة قعدت تدور على الإزارة بتاعتها، طلعت في الملعب نسياها، جريت تجبها بس ملقتهاش وصاحبتهم في التمرين قالت ليهم ولد كان عطشان شرب وأخدها معاه. اتغاظت هنا جدا وقالت إزاى ياخود حاجتى من غير استئذان، وفضلت جنى بصالها باستغراب وقالت لها خلاص تعالى اشترى إزازة مياه وخلاص. غضبت هنا أكتر وقالت معيش أي فلوس خلصتها. جنى قالت ولا أنا معايا فلوس خلصت كل المصروف والمياه بتاعتى كمان، مفيش حل غير إنك تستحملى ويلا نمشى بسرعة عشان ماما مستنيانا هناك. وهما ماشين لمامة جنى شافوا بنت واقفة بتعيط، قالت جنى مش دى البنت اللى وقع منها الفلوس، هنا ردت قالت آه إوعى تجبى سيرة عن الموضوع، سألت جنى: مالك ليه زعلانة؟ ردت وقالت وقع منى فلوس كنت محوشها عشان اشترى هدية لماما من معرض النادى عشان عيد الأم ومش هلحق أحوش تانى وزعلانة إنى مش هفرح ماما زى كل سنة.
هدتها جنى وهنا كانت واقفة خجلانة وعرفت إنها أد إيه كانت غلطانة وإن المفروض كانت ترجع ليها الفلوس عشان دى أمانة، واقترحت عليها وقالت ليها إيه رأيك تشوفى حاجة إنتى مش محتاجها وتبعيها وبكدا يكون معاكى فلوس، فرحت البنت بالفكرة جدا وقالت إزازة المياه دى أنا مش محتاجها عندى منها تلاته، ردت هنا وأنا منك شارياها أصل بتاعتى ضاعت لما كنت نسياها، بس انا مش معايا النهارده فلوس اقابلك بكره اخودها منك وأجبلك الفلوس من الحصالة. ردت البنت لا خوديها دلوقتى إحنا في بينا أمانة وبكره آخود منك الفلوس وكانت الإزازة مليانة وشربت هنا الميه بعد ما كانت عطشانة، وتانى يوم قابلتها وادتها الفلوس، قالت ليها البنت بس دول كتير قوى على الإزازة، وكانت هنا رجعت كل الفلوس اللى كانت واخداها بعد ما عرفت يعنى إيه أمانة.