اهداء لخالد سعيد ولكل شهيد .. مصر بتندهلي

اهداء
6 مقاطع
ل خالد سعيد
ل كل شهيد
بدل الحياه بالخلود
وجابلنا نهار عنيد
شمسه خطت كل الحدود
"1"
مصر بتندهلي
من وسط البيوت الطيبة الفقيرة
من وسط السواقي الدايرة الكتيرة
من سطور الشعر اللي ساكن
نبض العروق والقلوب الاميرة
بتقوللي قوم
من هنا وهناك
فُض الغيوم
ده اللي باقي مش كتير
ارمي الشباك
تحصد نجوم
نورها لسمَاك
واللي جي خير كتير
"2"
مستني ايه.. بعد الشهيد
بدر البدور !
مستني ايه .." خالد " جديد
يرمي البذور !
"3"
الكون خلاص ملك لاديك
مين ده اللي يقدر بس يعاديك
مين ده اللي يقدر يعادي كَبَدي
! والثورة عروسةو محجوزة ليك
"4"
البشر تروس تبني المكن
البشر مفاتيح جوة الكوالين
وارضي تبقى جنات عدَن
لو تشتغل بعزمِ متين
"5"
الكل يد واحدة بخمس صوابع
الكل ضحكة واحدة بلون الشمس
لون الزهور جوة المزارع
وكل اللي سامع يقول آمين
"6"
مصر بتندهلي
وصوتها غنوة ع الكمان
نفسي اسمع وازيد كمان
نِداها رِد الروح ف اللي مات
وبَدِل الكفر بايمان
وانا زُهد راهب ف الحياه
وعاشق كامن ف الضلوع
بلبي الندا ساعة نداه
وشقيت طريقي مفيش رجوع
مصر بتندهلي