صرخة

يا كُلْ أهل البلد يا خير جنود الأرض
مصر النهاردة ف خطر والظرف قام يشتد
سايق عليكو النبى حبوا البلد دى بجد
واللى يخاف عالبلد لازم يُقف ويصُد
مش ناقصة هى الفتن مش ناقصة نخسر حد
دا الفتنة لو سيطرت كل البلد تنهد
مش عاوزة نار الخطب واللا الخطاب يحتد
وإشاعة تملى البلد الحَق! دا قاموا الحد
وفلانة جت عندنا وفلانة ردت رد
والنار تقيد ف البلد والأزمة راح تشتد
والكل راح ينكوى ويعُض إيده عض
ونضيع قوام كلنا والحُر يرجع عَبْد
والخيط يضيع مننا لما الطريق ينسد
والشمس تغرب هنا وتضيق علينا الأرض
وننول غضب ربنا ونشوف وجوه تسود
وتفيض دموع الندم ما يحوشها أكبر سد
إيه العمل يا بلد؟ واحد يقوللى الرد
دا احنا اللى شفنا الشّقى وانداس كمان عالخد
والجوع قسم ضهرنا وانهد حيلنا هد
ولما أذن ربنا إن الكيان يترّد
ناكل كده ف بعضنا واللى انبنى ينهد
عاوزين نشوف شغلنا عاوزين نربّى الولد
ناخد بيد الوطن ونمد إيدنا مد
واللا بإيدينا البلد ترجع لحكم الفرد!
يا رب صون مصرنا من كل ظالم وغد
وارحمنا من نفسنا وازرع ما بيننّا الود
الإسكندرية