يا فرحة ما تمت

جبت خروف قلت أربيه.. وأرتاح م اللحمة وسعرها.. ياكلوا ولادى ويفرحوا بيه.. ومراتى تسند قلبها.. فوق السطوح قلت أربطه.. يبقى بعيد ويعيش فى أمان.. والناس ترتاح من دوشته.. ويكون بعيد عن أى جيران.. كل يوم تنظيف ورعاية.. وعايش حياته مع البرسيم.. ومحوطينه بأحلى عناية.. علشان ناكل لحم سليم.. العيال طالعين نازلين.. لولا الملامة.. يناموا جنبه.. م الأمراض والعين خايفين.. جايبين له بلسم مع شامبو.. كل يوم يزيد حلاوة.. وأحلامنا بتكبر وياه.. يجرى ويلعب بشقاوة.. وعيالى تلعب عاشقين لهواه.. وفجأة وبحكم القدر.. نط من فوق وانتحر.. الدنيا اسودت فى عنيه.. وعقلى خلاص راح ينفجر.. والجيران والناس اتلمت.. قالولى يا فرحة ما تمت.. آدى الزمن وآدى قسوته.. حرمنى أكل ليته.. لا أكلت لحمه ولا عضمه.. ولا نابنى حتى فروته.