مصرنا العظيمة

طول عمرك فى قلبك يا مصر شريانين.. مسلم وقبطى من زمان أخين.. طول عمرهم همهم رفع راياتك.. يفدوا جسمك الغالى وانت ضى العين.. مين اللى قال إن الكنائس تنحرق.. مين اللى سبب فى عز فرحتنا القلق.. مين اللى لبذور الفتنة والأحقاد زرع.. وطول عمرنا أحسن شعب اتخلق.. صعبان على الفوضى والبلطجة.. واللى زرعوا فينا الخوف والشقا..
صعبان على الدمعة نازلة من عينك.. ضاعت من قلوبهم آثار التقى.. مين اللى هاجم مستشفياتنا بالسيوف.. وبأسلحة بيضا ونار مع المولوتوف.. وضيع على المرضى حقهم فى الشفا.. وخلى الطبيب مرعوب وكله خوف.. يا ترى هما الرموز المحبوسين.. ولا عملاء للنظام ومدسوسين.. ولا نواب كانت واخدة على السرقة.. ولا تطرف الأفكار والاسم سلفيين.. الدين يا ناس عمره ما كان بالغصب.. ولكل واحد ديانته يرضى بيها الرب.. يا مصر ياما ضحى شهدا من أجلك.. قبطى ومسلم مات هناك فى الحرب.. مين اللى بيحرك فيهم الأحقاد.. غير الطامعين وسلسلة أوغاد.. علشان جيوبهم تكتظ بالملايين..
ولا يهمهم مصلحة غير فرحة الحساد.. يا جيشنا يا مغوار العدل تحققه الأحكام.. على كل ظالم سبب لمصرنا الآلام.. الجزاء من جنس العمل عادل.. حتى لو كان الحكم بالإعدام.. يا شرطة الأمن الشعب محتاجلك.. والشعب كله ثقة فى صميم عملك.. شعارك الجديد هوه اللى بيقودك.. لجل ما تحمى مصرنا وترجعى مجدك.. ويا شعب مصر العظيم احذر الأخطار.. غيوم الفلول مليانة بالأمطار.. تنزل على بذور فتنة لحرب أهلية.. علشان ما تدبح أحلام الثورة والثوار.. مصرنا العظيمة مذكورة فى القرآن.. وعد الإله أهلها سلام وأمان.. ووصانا النبى محبة كل أهل كتاب.. نشعر بالأمان والمحبة وسلامة الأوطان.