مرتضى منصور: «جبت مصطفى فتحي ب30 ألف و2 كيلو فسيخ وأعارته ب30مليون» (فيديو)

أبدى مرتضى منصور، رئيس نادي الزمالك، استيائه من الاتهامات التي يوجهها له البعض بإهدار المال العام، قائلًا: «بطمن الناس كلها. الشريف مايبخافش، والنظيف بيتعمل له تمثال».
وأضاف «منصور»، في مداخلة هاتفية ببرنامج «مساء الأنوار»: «الهوجة والأكذيب اللي مالية الدنيا إن خزينة النادي ناقصة 40 مليون جنيه، أنا بقولهم إحنا في دولة قانون، مرتضى منصور ليس فوق القانون، ولازم نعرف إن في ناديين ماينفعش تلعب معاهم مش علشان هما فوق القانون ولكن علشان هما متعة الشعب المصري، الأهلي والزمالك».
وتابع: «كان عندنا مشكلة كبيرة جدًا إن ممدوح عباس حاجز على جميع مستحقات الزمالك في جميع البنوك، وحاجز على فلوسنا في الشركة الراعية وفي اتحاد الإذاعة والتليفزيون وفي اتحاد الكرة، وجميع المحلات محجوز عليها».
وأضاف: «عندنا مديونية عبارة عن شيكات وعقود قروض، الشيكات بلغنا إن دفتر الشيكات اتسرق بالختم بتاعها، والشيكات ممدوح عباس كان كاتبها لممدوح عباس، بالنسبة لعقود القروض، أنا النهاردة جالي مليون دولار من تركي آل الشيخ، علشان أحولهم لخزينة النادي، لازم آخد موافقة من مديرية الشباب بالجيزة ووزير الشباب والرياضة، قدمت طلب هنا وطلب هنا، والفلوس اتحولت على النجم الساحلي علشان صفقة النقاز، لكن قروض ممدوح عباس كانت عقود من غير تاريخ ومن غير رقم جلسة، ورجعنا لمديرية الشباب والرياضة وللوزيرو وقالوا لا علم لنا بها، يبقى مالهاش وجود».
وواصل: «أنا شاري كهربا ب7 ملايين وجبتله إعارة وهو لسة لاعب عندي ب80 مليون جنيه يبقى أنا كسبت في كهربا أكثر من 70 مليون، يبقى يتعملي تمثال مش يتقال بهدر مال عام، ومصطفى فتحي جاي ب30 ألف جنيه و2 كيلو فسيخ وأعارته بأكثر من 30 مليون جنيه في سنة واحدة، يبقى أنا بزود المال العام، هانفترض الفلوس دي كلها جت على حساب النادي هايتحجز عليهم، طيب أنا عندي فرق قدم ويد وطائرة وغيرها وموظفين عاوزة فلوس لو أنا حجزت على الفلوس دي النادي هايتهد».
وأكد: «حساب هاني زادة اتفتح السنة اللي قبل اللي فاتت واتقفل اللي فاتت في المجلس القديم، مش عاوزين نتكلم في حاجة فاتت».