شكر الرئيس عبدالفتاح السيسي، السبت، اللواء أحمد فودة، مساعد رئيس الهيئة الهندسية للقوات المسلحة، وكل المشاركين في إنجاز العمل بأنفاق قناة السويس في مدة وصفها ب«الإنجاز الحقيقي». وأضاف السيسي، خلال افتتاحه عددا من المشروعات القومية بالإسماعيلية: «عندي أمل مش أنا بس أنا وكل المصريين، المشروع أكبر من كدا بكتير، معرفش الشركات هتبقى مستعدة تشتغل معانا نعمل المرحلة 14 كيلو، إحنا مستعدين إنهم يشتغلوا معانا نعمل لأول مرة بمصر كل حاجاتنا من الأول إلى الآخر بشركات مصرية ومعدات مصرية، بس أنا بقولهم وهما موجودين معانا هنا بقول هاخد المكن من هنا على مكن تاني هناك، لما بنعمل مشروع زي كده بناخد قروض من الدول التي تمول المشاريع دي، لكن في الحالة دي هيبقى التمويل من الدولة، والدولة قدرتها مش قوية على تمويل مشروع بالحجم دا لوحدها، محتاجين مع البنوك يبقى فيه تمويل وفايدة مناسبة شوية عشان يطلع المشروع». وتابع: «وبالمناسبة لن تكون أسعار المشاريع اللي جاية للمستخدم أسعار عادية زي اللي بتتقدم دلوقت، بكلمكم بكل صراحة، النهارده هتاخد 20 أو 30 مليار جنيه من البنوك لعمل خط مترو زي كدا أنفاق بس من غير معدات، والمعدات ب10 مليارات جنيه، ده مش هينفع نعمله والتذكرة بالسعر الموجود دلوقت ولا الضعف ولا 3 أضعاف بصراحة، لو أنتم جاهزين أنا جاهز». ورد «فودة» قائلا: «الشركات جاهزة، الشركات قادرة على تنفيذ المشاريع وتبقى الشركة الأم في تنفيذ المشروعات»، وقال السيسي: «ادرسوا الموضوع ونتكلم فيه وتبقى المسؤول عنه قدامي». وأكد اللواء فودة أنه تم اختيار مواقع أنفاق قناة السويس بدقة لتخدم القناة وسيناء، مؤكدا أنه تم الحفر بكفاءة تامة دون تأثير على حركة الملاحة بقناة السويس، مضيفًا أنه تم بدء العمل بالأنفاق بالتوازي مع استيراد ماكينات الحفر العملاقة، وتم العمل بالأنفاق 10 آلاف مهندس وفني وعلى أتم استعداد لتحد جديد في سبيل رفعة الوطن. ووصل السيسي إلى محافظة الإسماعيلية لافتتاح عدد من المشروعات التنموية بمنطقة قناة السويس. وكان في استقبال الرئيس السيسي- فور وصوله- إلى مقر الاحتفال وزير الدفاع والإنتاج الحربي، الفريق أول صدقي صبحي.
