شعر عامي ( نشيد الحب موالك )

ودايما بحبك ببدر انتصارى
وامد لسفينتك هوايا وبحارى
واشاور لفجرك يرد النهار
وتضحك عنيكى ما تعرف تدارى
وتبنى ف قلبى غصون المنار
وديك الأمانى ف دربك يصيح
ودايما نسامح بكل الملامح
ونبنى الموده بكل المطامح
ونزرع إراده ف كل المرامح
ونرمى بتعبنا لبكره المليح
ونمحى القساوه ما نعرف جحود
ونبنى بلدنا مداين سلام
ونلضم فوقيها عقود الحمام
لانك عشيقتى وإنتى الهيام
بدندن لعودك ف حضن النجوع
واشاور عنيكى ف حبى و هوايا
والملم ف شعرك مخافة الضياع
ودايما أصونك ما بين الضلوع
وبسأل عليكى ف كل القلوب
واغازل ملامحك ف كل البلاد
ترد المتاحف وتحكى القلاع
وتروى المنابر حكاوى الفتوح
ووحدة بلدنا ف عز الوجع
ووقفة بلدنا ف ليل الفزع
ونحضن ف روحنا حماة الجذور
وكل إللى ضحوا بغالى التمن
وماتوا فداكى وصبحوا الشعاع
وصانوا بعزة نفوسهم نفوس
ما هاموا بكلمة شيطان أو فلوس
ولا حتى خاضوا بحور الدلع
ودايما هلالك يحادى الصليب
ووحدة بلدنا عماد القلوب
ولمة حبايبك أملنا الرحيب
ف ليل المواجع نكون لك شهب
ووسط المعامع وبين الحجب
وننقش حروف المنى فى الولاد
طبايع ما تعرف تبيع الكلام
ودايما بحبك نقف ع الزناد
ونحفظ لوشك صباه الحنون
وصورتك ف سحر الضيا والبلابل
وغنوة طيورك ف وسط السنابل
وفوق المدافع ف عزم المناجل
ولمع السيوف
ف قلعة صلاحك وعز الهرم
وسدك وزندك وسمر الوشوش
وكل إللى عاهدوا ف كل الظروف
ونفضل فداكى ونحمى العرين
ما نعرف نلين
ولا نشوف إهانه ولا مستكين
ولا يوم نطاطى لمر الجراح
ولا نرمى طهرك مع السافلين
ولا من عاداتنا نخوض فى الدموع
ونندب حياتنا و كل إللى راح
دا ما كانش حملك بولدك سفاح
ودايما يا غاليه بنرفع راياتك
ما خافت قلوبنا من العصبجيه
وتمشى المراكب ف موج الخداع
ما تعرف تهادن زمانا اللقيط
لإنك بدرتى ف كل القلوب
مشاعر أبيه
تعيش فى السوهاجى و لاسكندرانى
وبين الأسايطه وفى الشرقاويه
على كل مدنه ف أرض المعز
وبين كل شعره ف راسك يا قطز
وبين كل نظرة أمل مصراويه
بحبك يا غاليه
واكونلك عوايش
واريدك مزار
وشامة محبه ف وش الفخار
وطير التلاقى ف عز الصدود
وقبلة أملنا ف أرض الخضار
وضلة قلوبنا ف حر النهار
ودفقة شعورنا بكل اللغات
واحبك أمانة ما تعرف تخون
وطلعة أميرة ف وش الربيع
وطيف الغناوى ف قلبى الرضيع
واحنى كفوفى بطينك تملى
وحلو الشمايل ف نبضك يغنى
واكحل عنيا بخير العرق
ولذة حلاوتك ف مر الكفاح
ودايما مشاعرك
تدارى ولادك ف وسط الرصيف
وتحمى اجتهادك ف هبو الخريف
وعطر ابتسامك يهفهف علينا
ف عز القيالى ونار الظروف
وتطلع نجومك ف وسط الغتام
وتحضن تاريخنا ف وادى الملوك
وفوق أرض سينا وتحت الخيام
تخط الحكايه بأزهى الحروف
وتفضل عنيكى مداين سلام.