صلاح دياب: «لو جبتوا آدم سميث يمسك وزارة الاستثمار في مصر مش هيقدر يعمل حاجة»

قال رجل الأعمال المهندس صلاح دياب، مؤسس جريدة «المصري اليوم»، إنه إذا تم تكليف آدم سميث، المعروف بلقب «أبوالاقتصاد الحديث»، بتولي وزارة الاستثمار في مصر، فلن يكون قادرًا على فعل أي شئ.
وأوضح دياب، في مداخلة هاتفية مع الإعلامي عمرو أديب والإعلامية رانيا بدوي، في برنامج «كل يوم» على قناة «ON E»: «لو جبتوا آدم سميث يمسك وزارة الاستثمار في مصر مش هيقدر يعمل حاجة، لسبب بسيط وزيرة الاستثمار دي ست تجلب الاستثمار وتستدعي الاستثمار يخش مصر، كويس، أنا أخش مصر إزاي وأنا دولاري لم يستقر بعد».
وأضاف دياب: «الدولار بيقولوا النهارده ب15 جنيه، وبكره يبقى ب18، النهارده ب10 جنيه، لما يبقى ب15 أنا قبل ما أقول بسم الله الرحمن الرحيم، أنا نص رأس مالي طار»، مستكملًا بقوله: «لازم عشان أستثمر أنا بختار.. بنتخب البلد اللي هحط فيها فلوسي»، مشددًا على ضرورة أن تكون الضريبة المقررة في الدولة «مستقرة» لجذب الاستثمارات.
وتابع: «أنا عندي شركات متعددة وعندي خبرات، إنما لو حضرتك جبتني أمسك وزارة الاستثمار أنا لن أنجح»، فقاطعه أديب بقوله: «الأوضاع الصعبة محتاجة شخصيات صعبة».
واستكمل دياب: «الشخصيات السوبر اللي اتعرفنا عليها على مدى ال15 سنة اللي فاتت كلها متهمة، وكلها اللي هربان واللي عليه 30 سنة واللي عليه 50 سنة، وممنوع التعامل معاها، أنا باخد الشخصيات اللي هي نمرة 2 نمرة 3، الرديف بتاع السوبر اللي كان عندي، وده اللي أنا بشتغل به النهارده، وأنا في أزمة من أشد ما يمكن، أنا مش محتاج يوسف بطرس أنا محتاج أستاذ يوسف بطرس، أنا مش محتاج رشيد أنا محتاج أستاذ رشيد، أنا محتاج أستاذ محمود محيي الدين، لأن الوضع النهارده أصبح لا يحتمل أنصاف المؤهلات وأنصاف المواهب، وفي الوقت نفسه أرجو ألا ننكر ظرف البلد».
وقال: «أمامنا مرحلة ناجزة وسريعة نضبط فيها مواردنا ونصلح شوية حاجات كثيرة جدًا».