خيري رمضان يهاجم الناخبين: «خليكوا قاعدين في البيت هتجيبوا برلمان فضيحة» (فيديو)

هاجم الإعلامي خيري رمضان، الأحد، الناخبين بعد ضعف الإقبال على الانتخابات البرلمانية.
ووصف «رمضان»، أثناء تغطيته للانتخابات، على قناة CBC، الانتخابات بمباراة دون جمهور، واللاعبين متوسطي الكفاءة، قائلًا: «مصر تتقاعس عن اختيار برلمانها، ماذا يفعل معلق كرة على مباراة اللاعبين في الملعب أغلبهم متوسطو المستوى، والجمهور غير موجود، أعتقد أن التعليق سيكون مملًا».
وأضاف ساخرًا: «ليه تنزلوا الانتخابات؟، خليكوا قاعدين في البيت، خلوها رايقة وزي الفل كده، أمال هتتكلموا في إيه؟، روحوا دوروا على مسلسل جميل اتفرجوا عليه، قد يكون ممتعًا لكم أن تلوك ألسنتكم نميمة مصر، يالا نتكلم عن أحوال البلد اللي زي الزفت، لكن توجع رجلك وتمشي خطوتين علشان تدلي بصوتك، ليه؟ علشان البرلمان؟ ما ييجي زي ما ييجي، هييجي ب50 مليون زي ما ييجي ب3 مليون».
ووجّه رسالة إلى العازفين عن المشاركة في الانتخابات البرلمانية: «سعادتها سعادتك من حقك إنك تفضل تقطع في المستوى، وتقول هو ده مستوى؟ هو ده أداء؟، ده شكل واحد ينفع في البرلمان؟، إنت مالك؟، في اللحظة التي لا تشارك فيه إنت مالك؟، هو ‘نت كان ليك دور؟، إنت اخترت إنك تقعد في البيت تطرقع في صوابعك».
وتابع: «يمكن يكون مش عاجبك الوضع السياسي، طيب تعالى نغير، مش عاجبك المرشحين؟، هما دول اللي عندنا في السوق، هتجيبوا برلمان فضيحة، اللجان فاضية علشان سيادتك منزلتش».
وأعرب عن استفزازه من المشهد، قائلًا: «أنا مش ببالغ، أنا بس مستفز من المشهد».