بالفيديو.. مخرج «سيب إيدي» يوجه رسالة للرئيس: «كان لازم أعمل إسفاف»

أذاع المخرج وائل الصديقي، مُخرج «سيب إيدي»، فيديو جديدا له يوضح فيه «الهدف الحقيقي لتصوير الكليب».
وقال «الصديقي» في الفيديو المنشور على صفحته الشخصية ب«فيس بوك»، السبت: «كان نفسي أوضح الهدف الحقيقي داخل مصر، ولكن هناك حرب ضدي من (مافيا) محتكرة صناعة السينما والتوزيع وحتى التصوير كلهم أسرة واحدة».
وأضاف «الصديقي» في رسالة من مقر إقامته بتونس: «الهدف الحقيقي من (سيب إيدي) واللي أول مرة أقوله، الشهرة، ليه اتشهر مش علشان الناس تتصور معايا في الشارع، لا علشان توصل رسالتي لرئيس الجمهورية».
وتابع: «أنا آمنت بيك ياريس وجيت من أمريكا من سنة ونص علشان أديك صوتي، ودلوقتي أنت مُطالب تقف جنبي، عملت شغل كتير ومحدش عرفني، حاولت أخد حقي وأطلع أفلام علشان الناس تعرفني واشتغل في المجال اللي بدرسه، وعرضت فلوس كتير عليهم وبرضو رفضوني، الهجوم اللي عليا دلوقتي ده شيء غريب يا ريس لأنه حصل في الأفلام والكليبات أكتر من الكليب بتاعي، علشان فيه ناس في مافيا السينما في مصر واقفين ضدي».
وأكمل: «ورايا أجيال ياريس تخرجوا من معاهد السينما، ومنتظرين الفرصة، أعرف ناس كتير يا ريس ومخرجين وشغالين كومبارسات، ليه علشان بقالنا 50 سنة نتفرج على نفس الناس، الناس دي لما كبرت دخلوا ولادهم».
وواصل: «بقالي سنتين يا ريس في مصر، لازم تعرف المشكلة دلوقتي أنا بفتح النار على كل صناع السينما لأنهم سبب في ضياع أجيال كثيرة، وانتشر التحرش والبلطجة، القائمين على السينما أصلا ليسوا سينمائيين، الوسط السينمائي ممكن يجيب لمصر فلوس أكثر من قناة السويس، طالب مساعدتك ياريس لوضع تصور يخلي السينما تدخل مليارات».
واستكمل: «مطلوب من الرئاسة زي ما وقفت جنبك يا ريس وآمنت بك لأن مصر كانت داخلة في حيطة، لازم تقف جنبي يا ريس لأن السينما داخلة في حيطة، وتطلع قرار جمهوري بتأميم كل دور السينما لصالح الدولة، وعمل وزارة يشرف عليها وزير سينمائي ومشهور عنه النزاهة».
يشار إلى أن محكمة جنح العجوزة، برئاسة المستشار محمد فتحي، وحضور أحمد عبدالفتاح وكيل النيابة، وسكرتارية محمد عبدالحكيم، قررت تأجيل محاكمة بطلة كليب سيب إيدي، لاتهامها بالتحريض على الفسق، في القضية التي تحمل رقم 10306 لسنة 2015 جنح العجوزة، لجلسة الأحد 31 مايو الجاري، لعدم الاختصاص الرقمي، مع استمرار حبس المتهمين.