رسالة إلى المجلس الأعلى للقوات المسلحة (2) حسبة برما - الحسبة و الحسبة المضادة

أشارت بعض الصحف مؤخرا لأخبار مفادها أن بعض الحكام يقومون بالضغط على الجيش المصري حتى لا تتم محاكمة مبارك و عائلته. وطبعا الضغط ده كان يتم عن طريق التهديد بسحب استثماراتهم و تسريح العمالة الموجودة لديهم. وحيث إن "الجيش و الشعب إيد واحدة". لازم نحط إيدينا في إيد الجيش علشان نحل الموضوع ده اللي بقى عامل زي حسبة برما. و علشان نعرف نحل الموضوع ده لازما و حتما ولا بد نعرف أصله و فصله ونحدد أبعاده كويس قوي. أصل الموضوع إن كان فيه مجموعة حكام موجودين في نفس الوقت وكل واحد قاعد في بلده مستكنيس و آخر تمام. قوم أيه... كل واحد في الناس دي عايش سلطان زمانه وعمال يغرف من الحلة الكبيرة اللي فيها ثروات شعوبهم...قوم إيه...لقوا الرئيس الامبراطور السابق تشاوسيسكو بتاع رومانيا قامت عليه ثورة...و أعدمته .... رميا بالرصاص هو و زوجته...قوم لعب الفار في عبهم و كل واحد بدأ يجهز طيارته الخاصة علشان يكت بيها وقت الثورة (أو الزنقة الزنقة على رأي القذافي) ...قوم إيه سألوا نفسهم طيب بعد ما نكت...هنعيش ازاي ونصرف مينين...قوم قالوا علينا و على الدول الكبرى ونحط فيها جزء من اللي غرفناه من الحلة... قوم شافوا عمنا صدام و اللي حصل له لما الدول الكبرى دي روقته...قوم الفار التاني بدأ يلعب في عبهم...وكمان بدأت تبقى فيه اتفاقيات بين الدول لتسليم المجرمين و مكافحة الفساد الدولي... قوم الفار التالت هو كمان بدأ يلعب... خللي بالك... دلوقتي بقه فيه تلات فيران بيلعبوا في عبهم...قوم طلعوا بالفكرة الشيطانية إن كل واحد فيهم يدي من الحلة بتاعته للتاني مغرفتين... و ياخد هو كمان منه مغرفتين....قوم كل واحد كده بقى له مغرفتين عند صاحبه... قوم لما أي بلد منهم تثور على حاكمها...يقوم طوالي كاتت على البلد بتاعة صاحبة اللي كان حاطط فيها لنفسه مغرفتين...ويعيش و يغرف من المغرفتين اللي هو شايلهم لوقت عوزة علشان ميبقاش قاعد عوالة على صاحبه...وفي نفس الوقت الشعب لما ثار...ثار على الحاكم بتاعه بس مش على صاحبه...قوم لما ياخد فلوس الحاكم ده...مش هياخد فلوس صاحبه لأنها بقت رؤس أموال دولية محدش يقدر يمسها...و إلا بقت سمعة البلاد كلها في خطر....و ده يا سيدي أول هام. تاني هام .... إن لو احنا سمحنا للحكام دول بالتدخل في شؤننا الداخلية...ممكن بعد كده يقولولك شيل الوزير بتاعك الفولاني و حط العلاني...قوم الوزير العلاني ده يعرف إن الحكام دي هي اللي جايباه فلازم يسمع كلامهم و يخش معاهم في نظام الحلة و المغرفة...قوم كده يبقى احنا سعادتك بنهرج و مفيش داعي للثورة.. و مولد و انفض. و على رأي محمد منير...يا ناس يا ناس هي دي الحدوتة.
نعمل ايه بقى في المغرز ده ... أقولك يا باشا... أول هام...لازم مواضيع ثروة الحكام دي يتحكم فيها قدام "القضاء العاجل" وفي حالة ثبوت وجود ثروة غير شرعية... يتم مصادرتها حالا بالا...هي و بقية الثروات الأجنبية غير الشرعيةالموجودة على أرض البلد. قوم الحكام الوحشين دول يسرحوا العمالة بتاعتنا اللي عندهم... قوم احنا ناخدهم... ودول برضه أهلنا و ناسنا و مش هنسيبهم...و الدول دي هي اللي خسرانة... و بعدين حصيلة مصادرة الأموال الأجنبية غيرالشرعية دي تتحط في صندوق...والصندوق ده يمول الناس اللي اتسرحت علشان يبقى عندهم فرص عمل... قوم يبقوا بينتجوا في بلدهم...بلد ما بينتجوا في الغربة... و الغربة مرة... قوم الناس دي تتغاظ أكتر فتسحب استثماراتها من عندنا... قوم نرفع عليهم قواضي علشان الفساد اللي هما متورطين فيه و ناخد أحكام دولية نبلغ بيها الانتربول...زي الموضوع القديم... بتاع سوزان تميم... قوم كده تبقى عليهم طبلت. و إن زادوا عن ذلك فسنزيدهم... قوللي ازاي؟..أقولك يا باشا... الحل في التبرعااااااااات... فاكر اللعبة اللي كانت الحكومة بتلعبها معايا في الدكتوراه لما كانت المصروفات الرسمية 95 جنيه و بياخدوا عليها تبرعات 1200 جنيه. أهو احنا بقى ممكن نلعب معاهم نفس اللعبة ونخليهم يدفعوا تبرعات على المرور في قناة السويس... طبعا التبرعات دي علشان تطوير القناة...قوم شوية و نعمل زي نجيب الريحاني في الفيلم لما كان بيبحبح ميزانية الخروف و عمل فيها كذا بند... برسيم للخروف و حبل للخروف و جردل مية للخروف.. علشان حضرة البشكاتب يهبر. و علشان منزعلش بقية الدول اللي بتعدي في القناة نعفيهم من بعض هذه البنود بحيث يفضل اجمالي تعريفة المرور في القناه ثابت بالنسبة لهم. قوم كمان ممكن نزود الموضوع كمان شوية... و نأخر لهم سفنهم كمان يا معلم.... قوم كمان ممكن نشن حرب اعلامية و دولية عليهم بحجة حقوق الانسان و المعتقلين السياسيين بتوعهم .....و نفضل على ده الحال..... لحد ما يوحوحوا ويشدوا الرحال. و بكده نوصل لنهاية السيناريو الخطير... للحفظ على ثورة التحرير. تفضل بس حاجة أخيرة....طيب و دلوقتي لو "القضاء العاجل " أثبت شرعية ثروة الحكام... و إن الكلام السابق كان مجرد ضرب من ضروب الأوهام... و إن مفيش اتفاق بينهم ولا نيلة... و إن الحياة كانت جميلة ...نعمل إيه؟!!! طبعا انت مستني مني الاجابة... عارف هقولك إيه!!!! هقولك معرفش ...
كدة انتهت رسالتنا. وحيث إننا في بلد ديمقراطي فيا ريت تساعدوني في ترتيب الرسائل الجاية إن شاء الله وتقولولي أكتب أنهي رسالة الأول علما بأن هذه الرسائل هي:
- رسالة إلى المجلس الأعلى للقوات المسلحة : مهمة خلف تل أبيب (و الاسم الآخر المقترح هو الأريب في الضغط على تل أبيب).
- رسالة إلى الحكومة: الايجاز في فهم ألغاز الغاز
- رسالة إلى الدستوريين: في شأن الرؤساء و نوابهم و الأقليات وأحوالهم.
و السلام ختام...
بقلم
د/ تامر مكي