تبرعوا تبرعوا تبرعوا

لن أقول أنه يستفزنى مشهدهم وهم ينظرون مباشرة فى عينيك حين تقترب منهم
ليس لأنهم يضعون عوائق أمامك أثناء سيرك بسيارتك على الطرق السريعة
لن أقول أنى أعتبرهم شحاذين
و لن أنكر أنهم بيصعبوا عليا
واقفين فى الحر والشمس
يمكن بيقعدوا فى الضل بعد أما بتبعد عنهم بالعربية
لكن فى أيام البرد والشتا
مابيقبلوكش إلا لما تقرب
وتبتدى تهدى
خوفا على العريية من المطبات
و ساعتها يبص فى عنيك
و يمد الصندوق اللى فى أيديه
تبرعوا لبناء مسجد رقم 5 فى القرية
وممكن رقم 6 أو 7
أكيد عمارة المساجد شئ مهم
و بيوت الله
و أن تجد راحتك فى المكان اللى بتقابل فيه ربنا
أو بتكلم ربنا فيه يعنى
شئ مهم بكل تأكيد
بس هى القرى دى مافيهاش بطالة
البنات فيها مابيتمرمطوش فى الشغل فى الحقول
الشباب فيها مابيلاقوش قهاوى يصيعوا عليها
مافيها مكفوفين أو معاقين حركيا
طيب مافيهاش أيتام محتاجين رعاية
المسجد جنب المسجد
لا يفصل بينهم أكتر من 50 او 100 متر
دا حتى فى المدن الأكبر
يبتعد المسجد عن مجاوره مش أقل من 500 او 600 متر
و بحكم سفرى المتكرر يومياً
أتوقف للصلاة فى مساجد كتلك
أكثر المساجد القروية ازدحاماً لا يصلى فيه أكثر من صفين
بالكتير 20 أو 25 مصلى
طيب الجامع ده اتكلف كام
و الواحد لو خدها مشى للجامع التانى هيتكلف كام
ليه مفيش مشاغل للبنات
تفصيل ملابس و تعليم خياطة
تنجيد
مطاحن صغيرة
أو كبيرة حتى
ورش نجارة
حرف يدوية بسيطة
و مربحة
صناعات صغيرة
مكان لتعليم القرآن وأحكامه
الكمبيوتر
محو الأمية
البلاد دى كلها مافيهاش مستوصف واحد قاعد فيه تمرجى حتى
يعنى لو جهزوا عيادة صغيرة
للطوارئ والإسعاف
مش عائد الكلام ده هيفيد الناس كلها
أكثر ما أخشاه هو أننا بنبى جوامع للتفاخر
و مين فرشها
و مين صلى فيها
و مين جددها
أنا شايف أنه جميل جدا أن يكون عندنا مسجد واحد أنيق ومرتب
وإستغلال الأموال فى عمل خدمات للقرويين أبنائها