في الفجالة: باب الرزق مفتوح لو اتقفل يبقى لوحة فنية

فى مبادرة تحمل طابعاً فنياً، بهدف تحويل شوارع القاهرة إلى معرض فنى كبير، شارك عدد كبير من الفنانين والمتطوعين الفنان محمد عبلة فى تجميل حى الفجالة، فى مبادرة أطلق عليها «أتيليه الشارع».
عبلة ورفاقه الفنانون استخدموا أدواتهم من الفرشاة والألوان فى تزيين واجهات المحال فى الحى العريق، ويبرر عبلة اختيار الفجالة: «هو حى جميل، وممكن بلمسة لونية نغير فى شكله، إحنا هنعمل كذا مرحلة ودى أولها، بنلون ونرسم على أبواب محلات السيراميك والمكتبات عشان تظهر المحلات وهى مقفولة كأنها معرض كبير، يعنى معرض فى الشارع.
وقال عن «أتيليه الشارع»: «الفكرة مش جديدة وسبق وعملناها فى مصر القديمة من 12 سنة وحبيت أغير شوية من شكل الشوارع ونزلت لفيت واخترت حى الفجالة، وده طبعا هيأثر على الناس وبدأت أجمع الشباب من خلال دعوة على الفيس بوك، واتقدم لى شباب كتير من هواة الرسم، وتطوعوا للتعبير عن موهبتهم.
كمال عبدالفتاح 20 سنة، طالب فى كلية تربية فنية، أحد المشاركين، قال: «الفكرة عجبتنى جدا وكان نفسى فى حاجة زى دى من زمان، بس ماكنش حد بيشجعنى وعرفت من أصحابى فى الفيس بوك ونزلنا كلنا نشارك فى النشاط ده».
وتوضح جاكلين جورج هدفها من المشاركة فى أتيليه الشارع: «كنا عايزين نحتك بأهالى الحى، وأكيد رسوماتنا هتأثر على سلوكهم وهيحاولوا يجملوا الشوارع، وياريت تبقى دى البداية عشان نجمل كل شوارع القاهرة والمحافظات.