أسرة طفل المنصورة الذي سحله أنصار مرسي: «ابننا معاق وماقدرش يدافع عن نفسه»

كشفت أسرة الطفل المسحول على أيدى أنصار الرئيس المعزول محمد مرسى بالمنصورة أن ابنها «معاق»، وأن شباب الإخوان ضربوه وسحلوه رغم عجزه عن الدفاع عن نفسه ولو بالكلمة. قال رشاد رمضان، والد إسلام- 44 سنة- ميكانيكى: «ابنى كان بيزور عمته فى شارع الجلاء، ولما نزل يتفرج على الأحداث فوجئ بعدد من أعضاء جماعة الإخوان المسلمين وأنصار الرئيس مرسى بيضربوه ويسحلوه بعد أن أشار عليه أحد أعضاء الجماعة، رغم أنه يعانى من إعاقة فى السمع والكلام حيث لا يسمع إلا بأذن واحدة فقط وبنسبة 20% فقط، وثقيل فى الكلام، ولما الإخوان وأنصار مرسى جروا عليه علشان يضربوه وقف مكانه ولم يتحرك من الخوف وماقدرش يتكلم أو يدافع عن نفسه، وصرخ كلمة واحدة فقط هى (أنا) وكررها أكثر من مرة». وأضاف: «لما عرفنا بالحادث ورحنا المستشفى فوجئنا بأن الطبيب اللى كشف عليه فى مستشفى طلخا إخوانى، ورفض يحتجزه رغم تقرير مستشفى المنصورة الدولى اللى طلب حجزه تحت الملاحظة، حتى تقرير المستشفى لم يثبت كل الإصابات الموجودة به، لكن مدير النيابة أثبت كل حاجة فى المحضر فابنى مصاب بجرح قطعى 15 غرزة أسفل الفخذ وجرح آخر عميق أسفل الإبط وكدمات فى الظهر والرأس ومسلوخ من الصدر لأنهم جرجروه وسحلوه فى الشارع». وتابع: «إسلام من ساعة الضرب ده وهو عايش فى رعب وبيصحى مفزوع من النوم، حتى وكيل النيابة طلب منه يتعرف على اللى ضربوه ضمن الناس اللى اتقبض عليها لكنه عيط ورفض وقال له: أنا خايف منهم». وقالت والدته جيهان عبدالكريم 40 سنة ربة منزل: «إحنا ناس غلابة ومالناش فى السياسة، وماشيين جنب الحيط ولا لنا دعوة بحد وابنى مش فاهم حاجة، وكان بيتفرج على المظاهرة وقعد يقول (الجيش والشعب إيد واحدة)، لأنه بيسمع ناس كتير بتقول كده».