يعني أيه مواطن درجة تانية ؟

يعني أنك تقف في طابور عيش طويل عريض
فيه من البني أدمين عن ميه و يزيد
يعني أنك تشوف شوارعك
غرقانة بمية المجاري و بتفيض
يعني أنك تتشد تحري..ولو مالكش ضهر
تاخد علي قفاك و أنت مبتسم سعيد
يعني انك تنسي يعني أيه فراخ و يعني أيه لحمة
ويعني أيه كحك و حتي يعني أيه عيد
يعني أنك تلغي من حياتك فكرة اللبس الجديد
يعني أنك تلغي من قاموسك كلمة لأ
لأنك لو فكرت و قولتها تتعاقب عقاب شديد
يعني أنك تكون مريض و معاكش تتعالج
ومش مشكلة إنشالله تعض في الحديد
يعني أنك تكون طالب في مدرسة
مالهاش علاقة لا بتربية ولا بتعليم لا من قريب و لا من بعيد
يعني أنك تكون خريج و عاطل..تركب قلب البحر تهرب
و العمر ده بتاع ربنا..و يدينا و يديك العمر المديد
يعني أنك تكون موظف..يطلع عينك و تشتغل عشان 300 جنيه
في شهر طويل عريض
عرفتوا يعني أيه مواطن درجة تانية
يعني مخلوق عايش تحت الحضيض
نهال علي ماهر