إسلام وشعبولا يستعدان للاحتفاء بإهانة بوش: خلاص مالكش لزمة تستاهل ألف جزمة

بطريقته الخاصة، استقبل كاتب الأغانى إسلام خليل واقعة ضرب الرئيس الأمريكى جورج بوش بالحذاء فى العراق، فبعد أقل من ساعة من متابعته الخبر ومشاهدة الواقعة فى عدد من الفضائيات، كتب إسلام أحدث أغنياته «مالكش لزمة» عبر خلالها عن فرحته بالصحفى العراقى منتظر الزيدى وسعادته بالإهانة التى تعرض لها بوش بعد سنوات تعرض خلالها العرب والعراقيون خاصة لعدد من الإهانات والانتهاكات على يديه.. تقول كلمات الأغنية:
خلاص مالكش لزمة.. يا بوش يا بن اللذينا
تستاهل ألف جزمة.. على اللى انت عملته فينا
الجزمة كانت مفاجأة تمام زى الزيارة
الدنيا بحالها فرحت والناس فضلت سهارى
يا قلوب كتير حزينة قومى يالا اتبسمي
شوفى بوش وهو خايف والجزمة بتترمى
بصراحة مقدرش أغشك وأقول زعلت عليك
ياريتها جت فى وشك وخزأت عينيك
صدام اللى انت دبحته فى أول يوم العيد
أهو أخد بتاره وفى نفس المواعيد
تحية عشان منتظر وتحية لجزمته
فرحنا فى بوش أخيراً على آخر خدمته
بجزمتين فى وشك هتسيب أمريكا على نارك
ويا عينى مش هتلحق يا بوش تاخد بتارك
فيه ناس كتير بسببك فى الدنيا مبهدلة
بتقول يا ريتها كانت صاروخ أو قنبلة
العالم كله شافك وبالسعادة حس
والجزمة زى الكورة وداخله فى المقص
مليون شهيد وأكتر فى الجنة فرحانين
ربك كبير وقادر يهد المتفرعنين
إسلام لم يستقر بعد على المطرب الذى سيؤدى الأغنية، خاصة أن شعبان مازال مريضاً بعد الأزمة الصحية التى تعرض لها فى العيد، لكنه سيطرحها عليه، وإذا لم يستطع تسجيلها خلال أيام فسيفكر فى مطرب آخر.
وقال إسلام: أخيراً لقيت حد غيرى يقف فى وجه بوش، أنا كنت أواجهه بقلمى وشعبان بصوته، ودلوقتى «منتظر» بجزمته.
وأكد شعبان عبدالرحيم سعادته بما تعرض له بوش وقال: حسيت بفرحة وانتعاش وإن شاء الله هاكلم إسلام وأعرف منه كلمات الأغنية وأشوف هتعجبنى ولا لأ، وإذا عجبتنى هاغنيها على طول، عشان أشارك كل مصرى وعربى فرحته فى بوش، ولولا مرضى كنت قعدت مع إسلام إمبارح وكتبناها سوا.