كلمات ليست كالكلمات

بكرة العيد.. يوم سعيد.. رص اللحمة صوانى صوانى.. مشوى ومقلى.. أما الشربة.. ابقى اعملى طاجن من الضانى.. دا احنا فى عهد.. يا وش السعد.. كما لو كان.. عايشين مجانى.. علشان كده من العيد للعيد.. بحكى وأعيد.. وأفضل أسن شهور فى أسنانى!
سامى عبدالبارى
يا عيد اللحمة يا حبيبنا.. سعر الخروف بيتوهنا.. حتى الجزار بيأدبنا.. باعنا يا عيد واشترى فينا.. يا عيد خروفنا بيدبحنا.. والجزار قلبه سلخنا.. وحكومة عايشة تسوحنا.. ومنين ما تمشى تودينا.. يا عيدنا مش قادر أطولك.. وأحس إنى عايش دورك.. وكل مكان عايشة عجولك.. بترعى ولا تسأل فينا.. يا عيد طريقنا للحمة.. صبح طريق عتمة وسد..
ولما أشوفها أضرب لخمة.. لأن التمن غالى علينا.. إزاى حعيد وأتسلى.. والناس فى نار بتتقلا.. وسعر اللحمة اللى بيغلا.. على فين يا عيد حيودينا.. يا عيد لحمتنا المشوية.. لا طايلها ولا طايلانى.. حرمونا منها الأغنيا.. وقلبوا عاليها فى واطيها.. طب اللى ساكن فى العشة.. ومعهوش يجيب حتى الكرشة.. أحسن له ينزل يتمشى.. ويقول اللى عطاكم يعطينا.
السيد أحمد على
الإسكندرية - فيكتوريا
كل سنة وأنت طيب.. كل عيد وأنت سعيد.. وأحلامك تتحقق.. وال خير ينتشر ويزيد.. وعزة الإسلام ترجع مرة تانية وتعود.. والمسجد الأقصى يرجع لنا من جديد.. والعراق تتحرر تانى.. والشرق يبقى حديد.. والمسلمين يجتمعوا ببعضهم.. ويفرحوا كلهم بالعيد.
مصطفى جاد
mostafagad.media@gmail.com
شيل من على أكتافك الهموم.. واتفائل بالخير تلاقيه.. يوم فرج وضيقة يوم مرة أفندى ومرة بيه.. مستحيل على شىء تدوم.. واللى يروح للخير يجيه.. شفت السما بعد الغيوم.. عارف النجوم موجودة ليه.. فكرت فى عز الليل تقوم.. تتوضى وتقف بين إيديه.. رفعت إيديك لله فى يوم.. بكيت بحرقة وتبت ليه.. ظنيت بأنه مش هاينجيك.. نجاك وهداك لصراطه.. علشان بيحبك بيبتليك..
وبيقولك حى على صلاته.. سابك ومرضيش يأزيك.. كنت بتبتغى مرضاته؟.. كل لما بتضعف كان بيقويك.. ويحصنك لما تقرا آياته.. لو يوم دخلت بيته يفرح بيك.. وينزل عليك هداياته.. كن مع الله فى كل يوم.. حاول تصلح.. حاول ترضيه.. هاتعيش حياة بدون هموم.. وتفوز بالجنة وتنظر ليه.. شيل من على أكتافك الهموم.
أيمن محمد جادو
لما طموحك يصبح وثنك.. لما غرورك يصبح سكنك.. ومابتشفشى غير نفسك.. وبتنسى بدورك كل الخلق.. تفتح بقك لجل ما يخرج كل صراخك.. يقفل خرسك مجرى الحلق.. وتغزل جوا البدن.. وخيوط عنكبوتك تصبح عفن.. وتبص على فرشتك تلقاها أكبر كفن.. وتبوس إيدين كل اللى طالع.. وتدوس برجلك ع اللى هبط.. فساعتها الموت فى الوطن يصبح أكبر عبط!
سيد شومان
sayed.shoman@gmail.com