مين اللي؟

17-9-2010
مين اللي؟
مين اللي جايب سيرتك بالردي؟
مين اللي شال سَترِك يابلدي؟
قصده إيه؟
قصده إيه؟
قصده إيه المبتدي؟
قصده يوريكِ إنتِ ويفوَقِك ولا يشمت فيك المعتدي؟
قصده يصحصحك وينجحك ولا تحت رجليهم تتمددي؟
مين اللي؟
مين اللي شاور ع الحرامي؟ حاميك بحق ولا هو كمان حرامي؟
مين اللي ملا الفضا ليك أغاني؟ حبيبك بقلب ولا هو ال جاني؟
مين اللي فضح عيبك ونقصِك؟ مسئول بجد ولا بس إعلامي؟
فضائي ولا أرضي؟ ولا كاتب خطه أصفر جرناني؟
ولا مجرد واد بيهيس ع النت وجات معاه حظ عمياني
يوووه جننتني طيرت عقلي وحيرت وجداني
**********
مين اللي في سماكي عوى؟
مين اللي قلبك بناره كوى؟
قصده إيه؟
قصده إيه؟
قصده إيه؟ وما انتوى؟
قصده بنعيبه يشجيكي ولا يساند البوم والعقرب والبوا؟
قصده بناره ينورك ولا يولعك وما يخلي فيكي حتى هوا؟
مين اللي؟
مين اللي قال وقسم ولادك دا مسيحي ودا إسلامي؟
راح يقول لِدا إنت بس الأصيل ولِدا أنت الوحيد الرباني؟
قال للأول يا كافر ما عادش فيها ليك أي حق
وقال لاخوه يا غازي روَّح بلدك إن جيت للحق
يفح ف ودن دا كلمة ويبخ في ودن التاني بق
ياخد من الأول كام واحدة ويقول للتاني ألف لأ
وإن قالوا سوا حقوقنا يقول للكل هاها هاهأ
**********
مين اللي؟
مين اللي سمم نيلك يا وردتي؟
مين اللي بَوَّر تربتك يا بلدتي؟
قصده إيه؟
قصده إيه؟
قصده إيه المفتري؟
قصده تتنوري وتتطوري.... ولا التراب تسفي وبيه تتعفري؟
قصده تتثقفي وتتحضري.... ولا في المجاهل تتوهي وتتغوري؟
**************
عمال ينبش في ماضي سقيم راح وانتهى
وبكره كمان وراه لو الخلاف ما انتهى
قولوا له خلاص كفاية جننتنا وجننتها
وشّْوشك دوخونا لما بميت لون لونتها
عامل لي فيها مفكر وانسان حقوقي .. وانت اللي خاربها وقاعد على تلها
عامل لي فيها شاعر فنان ومعارض .. وانت اللي نكدت علينا ولوثتها
عامل لي فيها نزيه وعفيف مع إن .. عملاتهم لك أملة ومنتهى
بدلتك تفضحك .. ممكن نسألك بكام دولار؟
فيلتك تفضحك .. ممكن نسألك بكام ريال؟
كلمتك تفضحك .. خدت تمنها كام شيكال؟
خلاص معدناش مصدقينك
ولا حتي تحلف بدينك
ما العملة بقت ديدينك
رُوح رَوَح للي باعتينك