هوّ السكوت ممنوع.. والكلام ممنوع

السكوت ممنوع وهو ده أساس الحرية.. الكلام ممنوع فى طوارئ الداخلية.. مصر أولاً مقولة وزير الخارجية.. شعار الحزب الوطنى هوّ الديمقراطية.. الحكومة بتقول إن العيشة مية مية.. وعاملين من البحر حلاوة طحينية.. لا هناك شرطة تنتهك الآدمية وتهين الإنسانية..
ولا هناك أنابيب وعيش ومعاش وطوابيرهم المأساوية.. ولا هناك فساد ولا رشوة ولا محسوبية.. ولا هناك مسؤولين حرامية.. ولا هناك إضرابات ولا اعتصامات مهنية.. ولا هناك قيود صحفية.. ولا هناك زيادة سكانية.. ولا هناك أزمة اقتصادية.. ولا هناك سوء أحوال تعليمية..
والأسعار دى أقل من العادية.. وهيوزعوا على بطاقات التموين فلوس نقدية وعلى الموظفين علاوات اجتماعية.. وخلاص هنعمل محطة نووية.. وهنتخلص من ذل المعونة الأمريكية.. يا سلام الدنيا بقى لونها بمبى وبطعم المهلبية.. بس لو حد شايف الدنيا سودة.. من فضلك تحدث مع حاتم فودة!
محمد رجاء عوض
mohammadragae@gmail.com