أسرة «المسحول»: «مش عاوزين شقق وفلوس من الداخلية».. «هما نسيوا علقة الثورة؟»

سيطرت حالة من الغضب على أسرة وجيران «حمادة»، بطل موقعة السحل أمام الاتحادية، ففى الوقت الذى صب فيه أهله جام غضبهم على ممارسات الداخلية، ووصفوها ب«القمعية»، خاصة بعد الضغط عليه لتغيير أقواله، لام عدد من جيرانه على «حمادة» لعدم قدرته على تحمل الضغوط.
ورصدت «المصرى اليوم» ردود أفعال أسرته عقب اتهامه للمتظاهرين، وتبرئته للداخلية، وأكدوا أنه لم يعلم أن الواقعة موثقة بالفيديو، وأن الشرطة والحكومة ضغطتا عليه بالترغيب والتهديد حتى يعدل من أقواله، لأن الواقعة مؤسفة ولاقت ردود فعل غاضبة فى الداخل والخارج، وطالبوا بإخراج حمادة من المستشفى والتحقيق معه من جديد وسط أهله.
قال أحمد حمادة، نجل الضحية الوحيد، إن والده اتصل به هاتفيا، الأحد، وهو ينهار من البكاء، وأخبره أنه يتعرض لضغوط، ويشعر بالخوف، والرعب من المجهول، وطالبه بأن يأتى وباقى ذويه ليخرجوه من مستشفى الشرطة إلى المنزل أو إلى أى مستشفى آخر، وأضاف «أحمد» أن والده لم يغير أقواله من فراغ، بل تعرض لضغوط شديدة من جانب الشرطة لأجل تغيير أقواله، مشيرا إلى أن والده لا يعرف أن الفضائيات سجلت واقعة سحله على يد الشرطة صوتا وصورة.
وتابع ابن الضحية والدموع تنهمر من عينيه: «إحنا مش عاوزين غير أبويا يخرج من مستشفى الشرطة، وييجى البيت أو مستشفى المطرية الحكومى، والنيابة تيجى تحقق معاه وسطينا ووسط أهله مش وسط الداخلية، أبويا حالته ما تستدعيش يقعد فى المستشفى تانى، الحكومة محاصراه علشان ما يقولش حاجة عن واقعة سحله، المستشفى بتاعتهم والظباط حواليه، ومش راضيين يدخلوا أهله أو المحامى، فطبيعى يغير أقواله، خصوصاً أنه راجل طيب وغلبان ومش وش بهدلة».
وأردف: «إحنا مش عاوزين شقق ولا فلوس من الداخلية، وأبويا لو خرج من وسطهم هيقول الحقيقة، لازم ناخد على الأقل رد اعتبار من الداخلية واللى عمل كده يتحاسب والقانون يأخد مجراه، إحنا فعلا غلابة بس أهم حاجة كرامتنا، وإحنا عايشين فى منطقة شعبية، لازم نقدر نرفع راسنا ونمشى فى الشارع بكرامة من جديد».
وأضاف ابن الضحية أن أهله وجيرانه وأهالى من منطقة المطرية سينظمون مسيرة إلى مستشفى الشرطة لإخراج والده من تحت أيدى الداخلية، وصرخ أحد أقاربه: «بالزوق بالعافية هيخرج، هما نسيوا العلقة اللى أخدوها وقت الثورة».
من جانبه قال محمد صابر «50 سنة» شقيق الضحية ويعمل مبيض محارة إنه حضر من الصعيد صباح اليوم ليتابع حالة شقيقه، بعد أن اتصل به ابن شقيقه، وشاهد الواقعة على التليفزيون، وردا على تغيير شقيقه لأقواله قال إن أى شخص فى مثل هذه الظروف خاصة فى ظروف حمادة وطبيعة شخصيته، وتحت التهديد والترغيب والضغوط والحصار فى المستشفى، سيغير من أقواله، على الأقل حتى يخرج من تحت أيديهم.
وأشار شقيق حمادة إلى أن الأهل والأقارب فى الصعيد انتابتهم حالة شديدة من الغضب من تعرية الأمن لأحد أبنائهم فى القاهرة، واصفا: «الصعيد بيغلى وهينفجر عما قريب، وتابع: «إحنا مش بتوع قطع طريق ولا ثورات ولا الكلام ده، لكن سكتنا، والناس قامت بثورة سكتنا، وقالوا عايزين مرسى رئيس سكتنا، لكن ما توصلش إننا نرجع لأساليب الشرطة فى عهد حسنى مبارك، واللى كان بيتعمل فى البنى آدميين جوه الأقسام وورا الحيطان، يتعمل تحت سما ربنا ويتذاع على القنوات».
واستطرد شقيق الضحية: «إحنا غلابة وعلى قد حالنا، لكن حمادة وأهله مش عاوزين شقق ولا فلوس ولا وظايف ولا معاش، أهم حاجة عندنا كرامتنا، علشان نعرف نرفع راسنا قدام الناس.
ولم يختلف غضب الجيران عن غضب أسرة «حمادة»، إذ عبر عدد من الجيران عن غضبهم من الداخلية والضحية على السواء، واتهموا الداخلية بالضغط عليه وتهديده وترغيبه لتغيير أقواله فى تحقيقات النيابة، وأمام الفضائيات، فيما أسقطوا لومهم على حمادة لأنه لم يتحمل الضغوط، ويقول الحقيقة، وأكدوا أن حمادة لم يشاهد الفيديو المسجل عن سحله، وأن الشرطة منعت المحامى وأهل حمادة من الدخول إلى المستشفى ومقابلة حمادة.
وقالت أم أحمد: «حمادة غلبان فوق ما أى حد يتصور والداخلية بتغريه بالشقة والفلوس والمعاش وضغطت عليه علشان يغير أقواله، خصوصا أنهم عزلوه عن أهله ومنعوا حد يدخله، وهو أكيد بيقول علقة تفوت ولا حد يموت».
وأضافت: «رجال المباحث كانت منتشرة فى الحارة بزى مدنى أول الاحد ، وحاولوا أن يأخذوا شريط فيديو من إحدى معدات القنوات، وأهالى الحارة حموا المصورين والصحفيين أثناء خروجهم من بيت الضحية إلى الشارع الرئيسى، وأشارت إلى أن إحدى المعدات أخف شريط فيديو داخل ملابسها، حتى لا يأخذه أحد منها».
ويتابع أحمد محمد طه «34 سنة» موظف: «حمادة لو علم أن القنوات سجلت واقعة سحله لم يكن ليغير أقواله، وأضاف: «احنا هنقف معاه لما يخرج من المستشفى ولازم يقول الحقيقة ويتخلص من الخوف اللى اتربينا عليه، فهو غلبان بس أهم حاجة الكرامة، وحكومة حسنى مبارك كانت أرحم بينا من اللى بيحصل فى مصر ده، وشكلهم ما تعلموش الدرس من اللى العلقة اللى اديتها ليهم الناس فى الثورة، وبقول لمرسى لو كانت الشرطة نفعت مبارك مكانتش وصلت ليك يا ريس».