عجائب المحافظين بين «خوفو» و«التيفود» و«سعد زغلول»

الظاهر إن اليومين دول يومين عجائب المحافظين فى مصر المهروسة، لسه ما خلصناش من حكاية محافظ القليوبية اللى ساب «التيفويد» يطيح فى أهالى قرية «البرادعة» شهر ونص حتى وصل العدد إلى 400 مصاب من خمسة أيام، وزمان العدد زاد ولم يتحرك إلا بعد أن استفسر منه الريس عن الوباء اللى عنده..
هنا هب وتشجع وبعد ما كان بيقول الأهالى همَّا السبب على صوته وحول المقاول الذى نفذ شبكة المياه الجديدة للنائب العام أما محافظ الجيزة فسرق الأضواء من القليوبية ومحافظها.. وأعلن خبراً ساراً سوف ينتشل الجيزة كلها من أهرامات الزبالة المنتشرة فى أفخر أحياء الجيزة والدقى.. إيه بقى؟ تاريخ العيد القومى للمحافظة بعد ما محافظة أكتوبر سلكت منه العيد القديم.. يقعد بقى من غير عيد؟ ده كلام..
خاصة زى ما احنا عارفين العيد القومى يتعمل من هنا المشاكل والإصلاحات والتطوير بعيد عنكم يهلّوا على طول.. المهم عمل السيد المحافظ اجتماعات سرية فى منتهى الكتمان.. لحسن حد يلهف منه الميعاد ولا حاجة وإنتوا عارفين الأعياد دى «بتتنظر» وطلعت اللجنة قالت إيه 23 أغسطس.. حلو قوى ليه؟ عشان ده اليوم اللى ابتدى فيه جدنا خوفو بناء الهرم!!!..
باليوم والساعة والثانية وطبعاً أى حد عاقل حتى لو ماعندوش دراية بالتاريخ هايسأل كيف يمكن تحديد تاريخ محدد قوى كده فى التاريخ المصرى القديم وإيه فى بداياته يعنى من 2400 سنة تقريباً قبل الميلاد بالتقويم الميلادى الذى طبق بعد الميلاد بمائة أو مائتين عام؟.. ده أولاً.. ثانياً ماحدش أساساً من كل دارسى علوم المصريات يعرف فترة حكم خوفو ذات نفسه قديماً قالوا عشرين سنة دلوقتى زى ما د. زاهى حواس قال من 30 - 33 وزمان قالوا إن البناء كان يتم فى شهور الفيضان فقط عشان الفلاحين بيتوقفوا عن العمل فى الأرض..
حالياً مع كل جديد فى التاريخ قالوا لا يمكن يتم بناء هرم خوفو فى حوالى خمس سنوات فقط هى مجموع شهور الفيضان فى عشرين سنة تقريباً، وتقريباً دى فى التاريخ المصرى أهم حاجة لأن إحنا بنتكلم عن حدث عمره 4400 سنة.. وطبعاً التاريخ الذى أعلن كان حاجة آخر تخريف ومثيرة للسخرية.
المهم إن سيادة المحافظ ولجنته السرية ليسوا جهلاء فى التاريخ القديم فقط بل فى الحديث أيضاً لأن 23 أغسطس هو ذكرى وفاة سعد زغلول ومصطفى النحاس..
سعد فى عام 1927 والنحاس عام 1965 وآدى علام المحافظ طلع زى علام اليومين دول.. عموماً أهى فرصة كويسة للوفديين إنهم يوم احتفالهم السنوى بذكرى سعد والنحاس فى 23 الجارى ستكون الجيزة كلها معهم فى الاحتفال وأهو كده يبقى فيه قيمة للتاريخ ويارب ما نسمع قريب عن عيد قومى يوم دخلة حتشبسوت أو يوم طهور رمسيس الثانى..
مفيش يا إخوانا فى مصر كلها غير اتنين محافظين على مستوى المسؤولية والإجادة د. سمير فرج فى الأقصر واللواء عادل لبيب فى الإسكندرية دول بيشتغلوا بقلب ونزاهة وحب وجدية، وأنا أقترح عقاباً لهما على هذا النشاز فى منظومة المحافظين إنهم ياخدوا كعب داير وكل واحد فيهم يقعد فى كل محافظة سنتين اتنين بس ويسيب كوادر جيدة وينقل على اللى بعدها.. ولا أقولكم بلاش.. خليهم فى الأقصر والإسكندرية نبقى على الأقل ضمنا محافظتين حلوين.. وآهو إحنا طول عمرنا بنرضى بقليلنا وبلاش طمع.