مايكل جاكسون

مايكل جاكسون جاكسون مايكل               كله كلام لك وتخاريف
 أصله مسيحى وبعدين أسلم                  أو مستغنى عن التعريف
كان مديون أو مش مديون                    أو كان شكله أبيض ولطيف
 سابغ وشه وسالخ جلده                      كله كلام بارد وسخيف
تقاليع زى النكتة البايخة                      وموضة لايقة على الحلاليف
شاغلين روحنا بمايكل جاكسون              مايكل جاكسون يطلع إيه!
 ظبطوه مره مرافق عيل                      مالنا وماله دخلنا إيه
كان أمريكى أو أفريقى                         نشغل بالنا بمايكل ليه
ولا كان غنى (نهج البردة)                    ولا يوم شوفنا العود فى إيديه
 
مايكل جاكسون مطرب غربى             مات أو عاش راح تفرق إيه
فكر يابن بلدنا فى حالك                       واشغل نفسك باللى جرالك
مايكل سرق المصنع منك                     واخد أرضك واخد مالك
 
أخد الغاز واداك عصفورة                    عند قفاك واقفة وقعدالك
 لبس لك طرطور فى دماغك                خلاك تبكى على أحوالك
 عرف ازاى بالذوق يحتلك                    ويخليك تعمل ما بدالك
فكر يابن بلدنا فى يومك                       واعرف بكره هاتروح فين
واسأل إمتى الفجر هايطلع                   واما هايطلع هاتشوف مين
والأيام هاتروق وتنور                        ولا هاتفضل عيشتك طين
فكر إمتى هاتزرع قمحك                    وتعيش زى الخلق يومين
واحمى قفاك من إيد سجانك                   يديك كف إديله اتنين
فكر يابن بلدنا وفوق                             يكفاك عشت سنين مخنوق
 أخدوا حصانك قفلوا عليه                   خمسين سنة جوه الصندوق
 ضحكوا عليك جاكسون وباراك             ركبوا على كتافك بالذوق
حتى قريبك ويا نسيبك                         نهبوا نصيبك المسروق
خانوا الملح وخانوا العشرة                   وسحبوك عند باراك مشنوق
سيد أحمد الهمشرى
sayedelhamshary@gmail.com