ينصركم قادر يا كريم

يا بو كريم إحنا معاك                      مصر بحالها واقفة وراك
خطط تكتك قول لولادك                  أفريقيا عاوزاكو هناك
يا حضرى يا سد يا عالى                 يا أملنا فى الفوز الغالى
عاوزين جماهيرنا تغنيلك                عاوزينك مارد طوالى
يابو تريكة يا فنان                          يا فارس كل الأزمان
وريهم فنك ومهارتك                      وإزاى بتجيب الإجوان
يا حسنى يا عابد ربك                     جماهيرنا كلها بتحبك
يا مدفع صواريخ متحرك                اسعدنا الله يسعد قلبك
يا معوض يا جناحنا الأيسر              بحماسك مش ممكن نخسر
فى ثوانى بتسحب زملاتك               وتفوت فى الدفاعات وتكسر
زيزو يا مشاغب فى الملعب             فرقتنا جنان وأنت بتلعب
عرفتك البرازيل والكاميرون          سمّاوى ع المرمى ومتعب
يا بركات يا خفيف الحركة               نفسنا تملا الحركات بركة
دايماً عقلك سابق رجلك                   أنت علامة شهيرة وماركة
يا سقا يا راجع لمكانك                     غاب وائل والفرصة عشانك
إياك تتركها تطير منك                     امسكها وتبت بسنانك
يا شوقى يا محور ألعاب                   خدماتك م الباب للباب
بتدافع وكمان بتهاجم                       وده كله بعقل وبحساب
يا عمرو يا صايم من فترة                حاسين إنك راجع بكرة
تنهى صيامك تثبت ذاتك                  لو تعرف محلاها الفطرة
يا متعب يا حبيبنا يا عمدة                 عارفينك مستنى اليوم ده
متعنا واتعب إخوانا                         بنشاطك وشوطاتك الجامدة
يا صقر يا كابتن يا عنيد                   جمّعهم بالإيد فى الإيد
حمسهم دا جنوب أفريقيا                   تحتاج قوة وعزم شديد
جمهورنا يا شباب يا عظيم               إملاهم عزم وتصميم
زودهم من عندك قوة                       ينصركم قادر يا كريم
أحمد عبدالرحمن