صباح النيكوتين والكافيين

■ كل سنة وانتوا طيبين.. النهاردة العيد.. النهاردة الصبح عدنا إلى قواعدنا سالمين.. فتحنا عينينا الأول مش فاهمين حاجة ومش مصدقين.. وبعدين بحلقنا جدا فى مج النسكافيه أو فنجال القهوة أو سطل الشاى.. وتنازعتنا شكوكنا.. نشرب ولا إيه؟.. ثم تجرعنا كماً رائعاً من الكافيين.. واللى بيدخن عبأ صدره بكمية لا بأس بها من النيكوتين.. يا سلام.. هكذا تستقيم الحياة ويعود المزاج للروقان بعد كمية المفسدات للصحة التى دلقناها فى أبداننا من دقيقة.
■ النهاردة ممنوع نقول كلام غم.. ولا نهرس فى أوجاعنا.. دعونا نزقطط شوية مطبقين نظرية العيد فرحة هييييييه هييييييه.. الحقيقة أنا معرفش أصل كلمة هييييه دى.. العيد فرحة وهييييييه.. النور يقطع ويرجع.. هييييييه.. الجون ييجى.. هيييييييه.. مش فيه تاتش هبل على خفيف كده؟!
حاجة واحدة شاغلة نافوخى.. أعتقد أن أحداً لا يستطيع أن ينكر أننا فى هذا الشهر الفضيل لا نفعل أى شىء فيما يتعلق بالعمل والإنجاز.. الحاجة الوحيدة التى ينجزها البعض منا هى التعبد وختم القرآن.. نفعل هذا بتركيز وكثافة شديدين.. عسانا نعوض ما فاتنا طوال العام.. ولو إن ده مش صح حيث إن التوازن مطلوب كل أيام السنة.. بينما البعض الآخر قاعد مجعمز قدام التليفزيون ولازق مناخيره فى الشاشة وماسك ريموت كونترول ومصاب بعته التقليب عشان يلحق يشوف الدراما والبرامج اللى اتكلفت بتاع اتنين مليار جنيه حسب كلام بعض النقاد والمحللين.. ولكن على مستوى العمل بقى إيدك والأرض.. شهر تتوقف وتتعطل فيه كل المصالح ولا يتم شىء.. والحجج موجودة وجاهزة خصوصا مع الحر.. يعنى قدامنا حوالى سبع تمن سنين حانكون صايمين فى الحر واليوم الطويل.. يعنى سبع تمن سنين حداشر شهر فقط شغل.. شيل منهم ييجى تلات سنين إجازات وعطلات رسمية وأعياد وخلافه.. يعنى التمن سنين اللى جايين حانشتغل منهم حوالى أربع سنين فقط.
■ يا ترى يا هل ترى.. فى الشهر اللى فات ده.. حصل إيه فى العالم البرانى؟.. كم اختراع تم ظهوره.. كم اكتشاف يفيد البشرية؟.. كم قضية نوقشت بجد وكم حل طرح على المائدة بينما إحنا قاعدين نتفرج على فوازير ميريام فارس؟
هل العالم المتربص بنا يضع فى حساباته أن هذه أمة ستتعطل شهراً كاملاً بحجة الصيام؟!.. وستصاب بالبله التليفزيونى والبذخ الإنتاجى والهطل الإعلانى شهر بحاله؟!
■ شوف بقى لما يبقى جزء من شغلك هو محاولة متابعة جزء من هذا الهطل.. نوع من العذاب برضه.. ورغم ذلك أستطيع أن أبدى بعض الملاحظات.
■ على فكرة بقى.. كل الأفكار التى طرحت فى برنامج بحث ميدانى زى العسل.. أفكار نميسة ومستنيرة.. وخصوصا فكرة وضع كوبس وزر كهربا على أول كل شارع.. عشان الشعب يطفى نور الشارع الصبح ويولعه بالليل.. مادام الحكومة نايمة.
أنا ما فهمتش ولا كلمة من مسلسل كليوباترا.. غالبا العيب فيا لأنى ما بتكلمش كازاخستانى أو أنجولى.
■ مكاسب كبيرة.. إياد نصار.. إياد نصار.. إياد نصار.. خالد الصاوى.. غادة عبدالرازق.. شباب قهوة سادة بلا استثناء.. أحمد عزمى.. آسر ياسين.. كل أبطال الحارة.. حسن الرداد.. ماجد الكدوانى.. كندة علوش.. محمد يس.. سامح عبدالعزيز.. هالة خليل.. محمد على.. وحيد حامد.. بلال فضل.. أحمد عبدالله.. هذا فى حدود ما رأيت فقط.. وليس حكما على أحد.
■ رغم عدم مواظبتى على مشاهدة أى شىء عدا مسلسل «الجماعة» فى رمضان فإننى بالصدفة وأثناء مرورى بغرفة المعيشة لاحظت شيئا مهماً جداً أود أن أوجه النظر إليه.. فى الحلقة الأخيرة من مسلسل العار.. كل الناس ماتوا.. المسلسل كله موت بعضه.. واللى ما ماتش اتبطح فى نافوخه أو جاتله عاهة مستديمة واتشل واتعمى.. وفيه شوية اتقبض عليهم.. غير اللى ما جرالوش ولا حاجة من دول بس تحول إلى عبيط وأهبل بفعل الكوارث والمصايب اللى حلت على نافوخ أهله.. وفيه عيال طلعوا مش ولاد أهاليهم.. وأبهات طلعوا مش أبهات.. وزوج دخل ع الولية اللى خدعته شخط فيها واداها قلمين وقالها بعنف كده: مين أبوالواد؟.. قالتله آى.. رجب.. قالها إنتى طالق.. وراح السجن لأبوالواد وتف عليه.. وفى المشهد الأخير بقى بعد ما كل الناس سرقوا بعض وخربوا بيت بعض ونسفوا بعض وخطفوا بعض وقتلوا بعض كلهم وماتوا.. اعترف البطل ييجى بسبعميت جريمة لوالدته اللى قعدت تلطم وتصوت من وقع وهول الصواعق والصدمات.. وتقوله انت اللى عملت الكارثة دى يابنى؟.. يقوم قايلها آه.. أصلى كنت عايز أحافظ عليكوا.. يعنى إنت اللى ولعت فينا كلنا؟.. أيوه كنت بحافظ عليكوا.. وانت اللى شنقت المشانيق وقتلت المقاتيل؟.. أصلى كنت بحافظ عليكوا.. يقوم أخوه الضابط داخل قايله انت اللى خربت بيتى وبوظت شغلى وسلطت عليا المجرمين وموت ابنى ومراتى.. الأم تذبهل وتقوله عملت كده يا حبيبى يا بنى يا منيل.. يقولها كنت بحافظ عليكوا.. فاصل من الشحتفة والمواجهات والجز على السنان والندم والتقطيع الميلودرامى.. والأم تنعى شبابها وعمرها اللى ضاع عليهم.. وكلابشات بقى وبوكسات ونظرات.. وفجأة نزلت تيترات النهاية وهى ترى ابنيها يخرجان إلى الهول واللاعودة.. مع إن فيه ابن تالت لسه قاتل مراته ومفجر نفسه فى بيت تانى جنبهم.. ماحدش جاب سيرته.. المسلسل قفل وهى مش عارفة.. تفتكروا ده حايكون الجزء التانى اللى جاى؟!
■ الصراع القديم.. الإخوان ضد الحزب الوطنى.
■ الصراع الجديد.. الإخوان ضد وحيد حامد.
■ الصراع الأجدد.. إحنا مع وحيد حامد ضد الإخوان والحزب الوطنى.
zahqanin@gmail.com