مرتضى منصور فى «الجريئة والمشاغبون»: تمنيت حبس يوسف شاهين.. لأن العنف اللى فى الشارع دلوقتى سببه الأفلام

اعترف المستشار مرتضى منصور، رئيس نادى الزمالك سابقاً، بأنه مشاغب بنسبة 50٪، وأن المشاغبة ظاهرة صحية، لكنه يأخذ حقه بالقانون،
وقال منصور خلال استضافته فى برنامج «الجريئة والمشاغبون»، أمس الأول، على قناة «نايل سينما»: «اللى بيسيب حقه وينام يبقى مكانه المقابر»، وتحدث منصور لمقدمة البرنامج المخرجة إيناس الدغيدى عن عدد المرات التى سجن فيها، فقال: «اتسجنت 4 مرات، سنة 71 عام الضباب، وكانت أول مرة أقود فيها مظاهرة، واتقبض على فى التحرير، واتسجنت شهر، دون علمى بتهمتى،
أما عام 87، زعلت من البلد أوى، ولولا مكالمة من رئيس الجمهورية لكنت مشيت من البلد تماماً، وكانت تهمتى انتقاد السيد رئيس الوزراء، على الرغم من أنها دلوقتى بقت موضة والكل بينتقد كله، بس وقتها كان صعب، والقاضى عمل مذكرة للسيد رئيس الجمهورية قال فيها: طلبوا منى أحكم لمرتضى منصور بالسجن 3 سنوات ورفضت ففصلونى، والمرة الرابعة سنة 97، والأخيرة سنة 2007 وكل مرة كان ليها ظروفها».
وعن الحكم الذى حصل عليه بحبس المخرج الراحل يوسف شاهين قال: «تمنيت تنفيذه، وياريت الحكم كان اتنفذ ماكُناش وصلنا للمرحلة اللى إحنا فيها دى من الأفلام، لأن العنف اللى بيحصل فى الشارع ده بسبب الأفلام، وكل حاجة بتحصل فى المجتمع».
هنا تحول الحوار ليتولى منصور دفة الحوار ويسأل إيناس الدغيدى عن أعمالها: «انتى عاوزة تقولى إيه فى أفلامك؟» فردت: «واحد من أفلامى (عفواً أيها القانون) كانت فكرته، ليه القانون بيدى الحق للرجل إنه لو ضبط خيانة زوجته وقتلها تعتبر جنحة، ولكن إذا حدث العكس تعتبر جناية»، إلا أن منصور اعتبر أنها قضية فاسدة، قائلاً: «القانون مش قانون سراير»، ردت الدغيدى: «ده القانون معمول عشان السراير».
ردت الدغيدى: «المشاهد فى الأفلام تعبر عن الواقع والحقيقة، ودى ظواهر جوه المجتمع، وللأسف إحنا مجتمع عاوز يعمل كل حاجة فى الخفى ولما نواجه، مش عاوزنا نتكلم».
هدأ الحوار بين الاثنين ليتحدث منصور عن تجربته فى تقديم البرامج التى لم تكتمل، حيث كان من المقرر أن يقدم برنامج باسم «ساعة مع مرتضى منصور»، مؤكداً أنه طلب أعلى أجر كمذيع فى العالم العربى 75 ألف جنيه فى الساعة، لكنه تراجع كى لا يظن أحد أنه كيد فى أحمد شوبير بعد وقف برامجه.
واختتمت الحلقة سخونتها بالحديث عن الحجاب الذى قالت عنه الدغيدى: «أنا مش عاوزة هذا النوع السائد من الحجاب، وأنا ضد الحجاب والخمار، ومش بتليق عليا الطرحة، والمجتمع كله بيلبس الحجاب لسبب اقتصادى أو اجتماعى»، فرد منصور: «ربنا يهديكى»، فقاطعته: «يهديك أنت أنا عملت حج و14 عمرة».