للحق لست من المتفقهين فى الدين . ولا.. لا سمح الله من المتطرفين فيه. عن علم او جهل ، وانا بالمناسبة.. لست ايضا خروفا من الخرفان. ولا حتى من اهل السيسى ، والعبد لله برضك.. ليس من اتباع حزب النور. والذى منه ، ولا قاعدى.. نسبة للقاعدة ، ولا.. دعشاوى. من اتباع الامام الخليفة ابو بكر البغدادى . ولكنى مثلك ، مصرى غلبان .كحيان .طافح المرار. والكوتا ، اى والله وباقضى عشايا.. انا والعيال وامهم احيانا .. نوم ؟ .. والحكاية.. اننى قد سمعت عن فتنة التعبان الاقرع . والذى قال صاحبنا انه ولا اقرع ولاحاجة. ولا حتى بشعر واستهزأ ممن يقولون . بعذاب. وحساب القبر ، وزاد وعاد وقالك : ومفيش حساب كمان لتارك الصلاة ، وكل عدا ذلك ولا مؤاخذة ودى من عندياتى خزعبلات .. والقصة مش .. فى مين قال . وايه قال ، القصة.. ليه الكلام ده بيتقال ، ودلوقتى بالذات .. واحنا بنواجه مشاكل بره وجوه وهم ما يتلم .. وفى بلد حسب اخر تقرير دولى مالى ، من ضمن اكبر 12 دولة فى العالم مهددة بالافلاس .. ومن مشاكل ما تتعد. ولا تحصى ، من مرور ونضافة. وقلة انتاج . وسيولة. وعملة وقلة ادب كمان .. وكمان عندك يا صديقى ، مشاكل الجيران فى ليبيا. وفى سوريا . وفى العراق . وفى العزيزة غزة واطماع الكبار والصغيرين فينا من امريكا واسرائيل .. وداعش والنصرة والقاعدة. والواقفة كمان اقولك كمان ، ازاى بتتكلم عن نهضة. وبلد حتبقى مش اد الدنيا بس دى حتبقى كل الدنيا ..وانت بتشعوذ. وبتنصب على الغلابة باقاويل ، فيها.. حاتجاوز يا عم واقولك خلاف بس مش بتاعك .. ده بتاع اهله من العالمين المتفقهين .. فى الدين والغريب ان صاحبنا. وجد من يروج لخزعبلاته.. فى القنوات الفضائية وعلى صفحات الجرايد . حتى ان كاتبا سياسيا. كتب بالاهرام يؤكد .. ان صاحب الخزعبلات فى طريقه.لان يكون مصلحا دينيا.. بعد ان كان مصلحا سياسيا يا.. سلام يا عم ، ماهو صحيح الكلام مش بفلوس .. ولا حتى عليه جمرك بس وحياة ابوك .. انت وهو احترموا عقلية البسطاء . اللى بتلقوا منكم. وبيضحكوا على اللى بتقولوه ، واحترموا.. ان البلد فى حاجة لما هو افضل للى يدفعها للامام ، ومش اللى يشدها للخلف لغرض فى نفس يعقوب وبلاش وحياة ابوك .. انت وهو الحركات دى ، لان الناس بتفهم.. افضل منه ومنك ومنى .. الف مرة والحكاية مش ناقصة اشتغالات ، تلهى الناس عن قضاياهم الحقيقية. ومشاكلهم الحياتية اليومية هو ايه يا عم .. عذاب فى الدنيا ، وفى الاخرة كمان .. الرحمة ...