عاشت دماغى حرة مستقلة

مرة تنتقد حمدين. فيقولوا عليك سيساوى. ومرة تنتقد السيسى .وبطانة السيسى .فيقولوا عليك واد سيس ..من بتوع 25 يناير. ومرة تمتدح السيسى .فيقولوا عليك .منافق .مرتزق .من بتوع الفلول. والحزب الواطى :الله مايعيده؟ ومرة تفتح نيرانك عالكل. فيقولوا عليك .ولا مؤاخذة ؟ خروف.. من بتوع السمع والطاعة. والريس مورسى .والشرعية والذى منه
والله العظيم انا. ولا.. مع حمدين .لانى وببساطة. متاكد وشايف. انه ادى دوره فى الانتخابات اللى فاتت للرياسة. وطلع من المنافسة. كريم .شريف .وقوى اكتر مما كان.
بس انا متاكد كمان زى .ما انا متاكد من نفسى .ان دور حمدين المرة دى هو :المحلل لمسرحية اسمها : الانتخابات الرياسية؟ وانا برضه.. مش مع السيسى .لان الراجل ادى دوره. وما شاء الله باقتدار. وحمانا من ام البلاوى. اللى اسمها الاخوان. وحبايب الاخوان .واللى كانوا أل ايه مش اخوان .بس بيحترموا الاخوان ؟! بس انا برضه. متاكد ان دور الراجل ده .كان مفروض ينتهى بكده .وزى ما قالك بنفسه: والله لا انا طامع فى سلطة. ولا كرسى ؟
وكمان سبب تانى يخليك تقلق .وهو ولا مؤاخذة. اللى حوالين السيد المشير سابقا. والمرشح للرياسة حاليا. وهما ناس .اجارك الله. اكلوا من موائد. لا تعد .ولا تحصى.. من ايام المرحوم عبد الناصر. وانت طالع . وواحد منهم .من ايام الملكية ! وعندهم موهبة هضم الزلط .من غيرخشا ولا حيا. رغم ان الناس كاشفاهم .وعرفاهم .وفقساهم كمان؟ واللى يغيظك اكتر .ان الراجل.. لم يتخذ اى اجراء ضدهم ؟فلم يبعدهم. ولا يقول لهم : متشكرين يا رجالة. وخدوا جنب بقى.
سبب تالت يخليك تقلق. وهو تصريحات الراجل نفسه. واصراره على ان يقول ما يريد. وليس مايريد المحاور.. ان يساله؟ وده بصراحة.. فال وحش . يديلك امارة ..على مستوى الحوار. اللى جاى. كمان اراءه عن : قانون التظاهر. واعادة توزيع خريطة مصر. والغاء الدعم.. و و و ؟حاجات كتير. كلها تخليك تقلق اكتر
انا باقولك كده. وانا عارف: انك حددت رايك من زمان. فى مين تختاره. بس ..وحياة ابوك حاول تفكر. خارج الصندوق .وبعيد عن العواطف. والتنهدات. وانتو نور عنينا. والذى منه؟ او حتى فى بعض اقوال.. الريس حمدين عن: الاشتراكية. والفقرا. والناصرية. وغيرها من الاقوال.. اللى عفا عليها الزمن
ومش معنى كده.. انك تقاطع لا سمح الله
اوانك تروح بس.. عشان تبطل صوتك
فى كل الاحوال ..الرأي رايك. ومفيش حد .حيجبرك عليه
وفى الاول.وفى الآخر
متخليش حد. يلعب فى :عداد مخك
وخليك زى حالاتى. رافع شعار واحد. وما تغيروش
عاشت دماغى :حرة مستقلة
والا تحولت دماغك.. لطبق. يجيبوا فيه الفول
ولا مؤاخذة ؟