سخرية من هتافات مظاهرة العباسية: إديني رصاصة بسرعة..أرجوك محتاجة الجرعة!

بعد صدور بيان أمس من ائتلاف "الأغلبية الصامتة" يدعو فيه المصريين للانضمام إلى مليونيتهم في العباسية لرفض ما أسموه ب"التخريب والوصاية الأجنبية"، انهالت التعليقات الساخرة الرافضة لهذه الدعوة في ظل وجود مليونية أخرى بالتحرير تدعو لرفض الوصاية الأجنبية ورفض ضرب وسحل المتظاهرين.
تسابقت صفحات "فيس بوك" فى إطلاق التعليقات التي تسخر من هتافات العباسيين وتوقعت أن تكون كلها مناشدة للعسكر أن يعاملهم بطريقة "ضرب الحبيب زي أكل الزبيب".
واعتادت صفحة "القائمة السوداء للمشاهير الذين باعوا مصر واختاروا النظام" المناوئة للسلطة أن تتهكم على مرتادي العباسية وغيرهم من المسبحين بحمد السلطان فصورت هتافات العباسيين:
- يا تقتلنا زيهم.. يا هننضم في صفهم.
- جيش.. حربية.. مصرية متعرية.
- يا مشير قول لعنان.. عايز أروح أنا بردان.
- إديني رصاصة بسرعة.. أرجوك محتاجة الجرعة.
- يا عسكري يابو بندقية.. تعال إضرب البنت ديه.
- آه بنخاف.. آه بنطاطي.. إحنا أساسا تبع الواطي.
- ياللا يا مجلس شد الهمة.. إضرب إسحل عري بذمة.
تعليقات طريفة أخرى انهمرت على صفحات "فيس بوك" منها:
- هتافات العباسية: قلعني حته حته.. واسحلني في اي حته / انا كنت بحب مبارك.. دلوقتي بحبك انت
- قلعوني قلعوني وشوفو الفرحة جوا عيوني.
- يا جيشنا قلع فينا حكم العسكر هيدفينا.
- يامشير قول عنان إحنا ليك كلنا نسوان !!
- توفيق عكاشة من العباسية: يا مشير كاك كاك.. بط ووز إحنا معاك.
بعض التعليقات الساخرة تجاوزت متظاهري العباسية إلى المجلس العسكري ووزارة الداخلية منها:
- الجيش أقسم على حماية ممتلكات المصريين.. مش المصريين نفسهم.. في حالة الهجوم عليك إعمل نفسك مبنى.
- ترشيدًا للإنفاق الحكومى- أجهزة الأمن لم تعد تستورد الغاز المسيل للدموع، فالمولوتوف والحجارة أرخص- وكذلك تم استبدال هراوة الشرطة البلاستيكية المستوردة - بماسورة حديد بوصة ونص.
- لو ستات مصر حطت المجلس العسكرى فى دماغها و نكدت عليه زى جوزها.. مش بعيد تلاقى طنطاوى والرجالة نازلين التحرير يهتفوا: يسقط يسقط حكم العسكر.
- أحدث افتكاسة: قال لك المخربين حرقوا المجمع العلمي علشان فيه الخرايط والوثائق اللي بتدل على حدود مصر، ولما اتحرق أي حد ممكن يحتلنا علشان معندناش وثائق.
- خير اللهم اجعله خير: حلمت ان فيه واحد طويل - ماشاء الله طول بعرض - بيجري في الشارع وقاعد يقول أنا ديكتاتور.. أنا ديكتاتور، وستات مصر كلها بتجري وراه.