أسماء محفوظ تكتب ل"المشهد": أيام الألم والأحلام والترشيح لنوبل

كانوا مجموعة شباب لا يملكون إلا حلمهم ، اكتشفوا واكتشفت معهم مصر أن الأحلام أقوى من الرصاص والتسلط والقهر ، بالحلم وحده صعدوا من مجرد "فتية وصبايا مشاغبين" إلى منارات يهتدي بها عشاق الحرية في العالم، ويتم ترشيح ممثلين عنهم لأرقى الجوائز الدولية .. نوبل للسلام ..اسماء محفوظ واحدة من المشاغبين الحالمين الذين غيروا مصر وفجروا ثورتها تمسك طرف خيط الأمل والألم وتكتب للمشهد :
لما سمعت عن خبر ترشيح حركة شباب 6 ابريل لجائزة نوبل للسلام افتكرت من 3 سنين لما كنا قاعدين مجموعة من الابريليين بعد ما انهينا اجتماع تحضيري لاحد الفاعليات واحنا بنحلم ونهزر ونقول بكرة بعد الثورة مين فينا هيبقى رئيس ومين فينا هيبقى وزير وكنا بنضحك وبندي لنفسنا الأمل اننا قادرين على تحقيق حلم الثورة في نفس الوقت اللي كانت الناس وعلى رأسهم اهالينا واصحابنا بيقولو علينا مجانين عشان بنحلم باسقاط مبارك
قد ايه كان عندنا ثقة اننا صح وكان عندنا عزيمة اننا نكمل للنهاية .. فاكرة يوم ما اعتقلو احمد ماهر ( مؤسس والمنسق العام للحركة ) وعذبوه اشد تعذيب وهما بيحاولو ياخدو منه باسورد الجروب على الفيس بوك وعرضو عليه امتيازات كتير لو سمع كلامهم وبقى معاهم وهو رفض واستحمل التعذيب
فاكرة ضحكته وهو بيحكي اللي حصله الضحكة اللي بيخبي وراها آلم شديد وحزن واحساس بالظلم لكن كان بيضحك عشان يقوي نفسه ويقوينا معاه.
ولما قررنا اننا نأسس الحركة في يونيو 2008 كان جوانا حلم وعندنا تصميم على تحقيقه ... كنا بننزل احيانا 50 فرد بنهتف بأعلى صوتنا " يسقط يسقط حسني مبارك" وحوالينا مئات من بلطجية مبارك وقيادات أمن العادلي ، مكناش بنخاف كان كل ما القمع والظلم بيزيد كان كل ما تصميمنا وارادتنا وقوتنا بتزيد . كان كل ما يعتقلو مننا واحد من الحركة كنا ننزل 100 نعتصم امام النائب العام لحد ما يخرج
كنا بننزل بنوزع منشورات في كل مناطق مصر دعوات لفعاليتنا .. كنا بننزل في منصف الليل نرش اسبراي على الكباري وجدران المباني بالدعوة لاسقاط مبارك
كنا بننزل نتضامن مع مطالب النقابات والعمال والربط بين مشاكلهم وبين نظام مبارك
فاكرة يوم 25 يناير لما شفت كم العدد الهائل من الناس المشاركة ومن كتر الفرحة عيطت وكانت اول مرة اعرف يعني ايه اعيط من الفرحة . اتاكدت ساعتها ان احنا كنا صح وان ارادة حلمنا كانت اقوى بكتير من نظام مبارك ، ودلوقتي مكمليين ضد اي ديكتاتور يفتكر نفسه اقوى من مبارك مكمليين حلمنا برغم كمية التخوين من امتداد نظام مبارك (المجلس العسكري) ومن بعض الناس ، مكمليين لحد ما نشوف حلمنا بيكمل في بناء دولة حرة مدنية ديمقراطية يعامل فيها المصري بكامل انسانيته.
برغم اني تركت 6 ابريل لكن مازلت ابريلية بفتخر بالحركة وكل من فيها..
تحية لكل اعضاء 6 ابريل