أدينى كبرت..قصيدة جديدة للشاعر مدحت عيّاد

أديني كبرت والزمان قاسي وحانيني
والوجع عامل جدع
شادد في حيله وبيرازيني
وكل ما بتقولي أُصبر
بكرا تحلا.. بتغيظيني
بكرا مين
نص عمري ضاع.. واديني
لسه بحلم والله أعلم
مخبيالى إيه سنينى
بصي: لو غالي عليكي وعايزه فعلا تخدميني
افضلي صومي وصلي وف صلاتك ارفعيني
وماتطلبيش اني ابقى احسن
وماتطلبيش الخير يجييني
اطلبي اني ارجع صغير
اطلبي تنعاد سنيني
وانسى افكاري ومبادئي
ومن تانى ربيني
وان حصل ورجعت عيل
نتفق وهتوعديني
ان انتى تقسي عليا
ماتضعفيش وتدلعيني
فيها ايه لوانام معيط
ولو في اوضه تحبسيني
فيها ايه لو ابات جعان
مصروفي منّه تحرميني
ولما اقولك لأ واعاند
بأى حاجه واضربيني
مستغربه من ايه ياغاليه
ايوه إقسى وعنّفيني
طلعيني انسان اناني
انسان وصولي مالهوش قلب
حرمي عليا اني اصاحب او اجامل او احب
حرمي عليا الهزار وازرعيلي في قلبي رعب
من المشاعر
والحنان
علميني ابقى صعب
علميني اخد بتاري
علميني اشتم واسب
وشددي عليّا إن حصل وصبحت اب
ماطلّعش ابني حمَل او يمامه
اطلعه اسد وذئب
يامّه زمن الطيبه عدي
وصبحنا في زمن ابن كلب
زمن الاخ يبيع اخوه علشان سيجاره
والنداله والخيانه والخسه بقوا شطاره
واللف والدوران ذكاء
واعراض الناس تجاره
يامه الناس مابقتش تفهم او تهتم بالقلوب
انتى فاكره إنى حابب ابقى مليان بالعيوب
غيرش بس ان الزمن حاله ماشي بالمقلوب
يبقى اتحمل واكمل زي ما انتى ربيتيني
وابقى عايش قلبي خايف من نصيب بيعاديني
ولا اغيّر نفسي وابقى.. حد غيري.. إنصحيني