أحمد عز يستشهد بالقرآن.. وزينة: "ربنا يكفي كل البنات شر عديمي الرجولة"

بعد أن نشر الفنّان أحمد عز رسالة إلى جمهوره عبر صفحته الرسمية على “فيسبوك” قال فيها : “مساء الفل ياعيلتي واهلي، كتير سألوا عليا امبارح وانا باطمنكوا انا الحمد لله كويس وزي الفل وراضي باللي ربنا كاتبهولي كله، انا كمان مش بس راضي انا سعيد “بالابتلاء” اللي انا فيه عشان واثق في ربنا وفي نصره ان عاجلا او اجلا!!! وان اللي انا فيه ده ماهو الا رفع درجات بإذن الله”.
وأضاف: “طبعا انا لا اعلق علي احكام القضاء ومش هاطلع اعمل دوشه ولا اتكلم عشان انا سايب حقي علي ربنا العادل الحق. اللي بقولهولكوا دلوقتي هو نفسه اللي بقوله من اول يوم في القضيه وهافضل أقوله لآخر نفس في عمري.. وبأشهد الله علي كلامي ده بل وأقسم بالله العلي العظيم “اني ماتجوزتهاش ولا رسمي ولا عرفي ولا شفهي ولا ثانيه وان شاالله يكون معاها 100 حكم و100 شهاده ميلاد برضه مش ولادي”.
وختم بأية من القرآن الكريم: “بسم الله الرحمن الرحيم، ولا تحسبن الله غافلاً عما يعمل الظالمون انما يؤخرهم ليومٍ تشخص فيه الأبصار”.
من جهتها ردّت زينة بعد تصريح أحمد عزّ الأخير عن توأميها “برضه مش ولادي”، واصفته بالظالم الذي بظلم “جاحد شيطان فرخه حتى ماحصلش دجاجه”.
وقالت زينة عبر حسابها في انستغرام”: الحمد لله ، بشكر القضاء المصري العظيم اللي اظهر الحق الحمد لله عاوزه أوضح حاجه علشان الكذب المستمر، الحكم الحمد لله بيعتمد علي إثبات الزواج وبناء عليه تم إثبات النسب انا كنت ملتزمة الصمت واتعرضت للاشاعات الحقيره وكنت بشوف اللي بيتقال عليا والحقيقة اني كنت واثقه في عدل رينا الحمد لله” .
وأضافت: “الانتصار ده انتصار مش ليا لوحدي ده للستات كلهم القضيه دي في منها كتير بس قضيتي اتحولت لرأي عام علشان انا مشهورة والطرف التاني برده،نفسي كل ست مظلومه تاخد حقها حتي لو غلطت واتجوزت وأحد عديم الضمير والانسانيةو كداب بس كداب حتي في النفس اللي بيتنفسه ،ربنا يكفي كل البنات شر عديمي الرجولة ويكرم كل البنات بناس محترمه تحافظ عليهم وأكيد في ناس محترمة كتير”.
وتابعت: “يارب يستر كل البنات ويحفظهم. ربنا اظهر الحق الحمد لله وانا عاوزه أعيش واربي ولادي وأشوف شغلي وانسي الأيام السوده اللي شفتها من اول الجواز لغاية يوم الحكم، مش عاوزه اسمع اسم ابو أولادي ده تاني ولا حتي حد يغلط فيه علشان مايصحش للاسف علشان ولاده، وربنا كبير ولسه حسابه عند ربنا الله يكون في عونه بقي ساعة الحساب اللي مافيهاش معجبات”.
وحتمت: “فرحت الناس بظهور الحق اكتر حاجه حسستني ان الناس معايا او تحديدا مع الولاد، مين ممكن يعادي أطفال ويظلمهم غير جاحد شيطان فرخه حتى ماحصلش دجاجه”.