_ تحدث الفريق أحمد شفيق، رئيس وزراء مصر الأسبق، في مداخلة هاتفية ببرنامج "القاهرة اليوم"، عن نتيجة انتخابات الرئاسة لعام 2012، والتي خسرها أمام مرشح الإخوان المسلمين حينها الدكتور محمد مرسي. شفيق قال: "أنا قلت إن أنا بعدت، عشان الناس اللي بيتهكموا ويقولوا العمرة الممتدة، أنا بعدت تاني يوم النتيجة الغريبة دي، فقد تقبلتها تماما وانطلقت، يعني الإجرائات سليمة مية المية، وقلت خطاب أعلنت فيه إقراري بالنتيجة وتهنئتي للرئيس". وأضاف: "تاني يوم، بعد النتيجة ب 48 ساعة، أو أقل من 48 ساعة بشوية، قال لي بالنص، أنت عارف يا أحمد ظروف الانتخابات بقى، قلت له ماشي يعني أنا مقدر تمامًا، قال لي قول لي الشارع بيقول إيه يا أحمد، قلت له أنا بتكاسل كدة في الكلام عشان مبقاش محدد أوي يعني، دي طريقة لي عشان أشكك في الكلام اللي أنا بقوله شوية يعني، قلت له والله أنا اللي شايفة إن الشارع بيقول هو إيه اللي حصل من اللجنة". وتابع: "قام المشير طنطاوي رد على وقال لي يعني هم مغلطين اللجنة، حاجة زي كدة، قلت له والله هذا ما يقال، قعدنا 5 بنتبادل الحديث، قلت له على فكرة أنا من أيام وفاة زوجتي وكان بقالها شهر شهر ونص متوفية، أنا عايز أنا ناوي أطلعلها عمرة وأنا بقول لحضرتك إن أنا هطلع عمرة وأتعشم إنها تاخد 3-4 أيام، لو أنا استمعت إلى شيء مريحنيش وأنا متابع الأخبار جيد جدًا أنا قد تتأخر عودتي بناءً على الموقف الجديد اللي هيحصل، فقال لي ليه هو فيه حاجة، قلت له لسة مفيش حاجة بس». واختتم: "أنا بقى الساعة 12 بليل أنا قررت إن أنا أطلع في طائرة 4 إلا ربع الصبح من تواتر الأخبار اللي بتجيني ودورت على الناس يدوني التأشيرة في الوقت المتأخر بليل لأحد أبنائي واتكلت على الله متعجلًا في ساعة لميت شنطي وطلعت على المطار، حينما علمت إن أنا بيحاك لي بأسرع ما يمكن أو الناس يعني خدت مهام شنكلة أحمد شفيق بأي طريق".