محمد طلبة رضوان يكتب: الحلوة حلوة وحاسدينها

لما البرادعي وقف قدام نظام مبارك في عز جبروته ده مكانش موقف وطني من البرادعي .. ده كان نفسنة على مبارك
لما حركة كفاية طالبت بسقوط مبارك ده مكانش عشان مستقبل مصر .. ده كان نفسنة على مبارك
لما شباب الجمعية الوطنية للتغيير وقفوا قدام مشروع التوريث .. ده مكانش عشان مصر خالص .. ده كان نفسنة على الشاب الحيلوة اللي ربنا اداله من وسع .. جمال مبارك
لما شباب الثورة نزلوا الميادين وأسقطوا النظام .. ده مكانش عشان عندهم حلم .. دول كانوا منفسنين ع النظام
لما عبد الحليم قنديل كان بيكتب ضد مبارك وعائلته .. ده مكانش عشان كلمة الحق .. ده كان منفسن ع العيلة المالكة ..
لما جورج اسحاق كان بيقف يصرخ في ميادين مصر ضد الفساد .. ده مكانش عشان بيكره الفساد .. ده كان منفسن ع المفسدين
لما الناس كانت هتطق من احتكار أحمد عز للحديد وارتفاع أسعاره الجنونية .. دي مكانتش غضبة للحق .. دي كانت نفسنة على أحمد عز والرزق اللي ربنا بعتهوله
لما الناس نزلت في 30/ 6 وهتفت ضد الإخوان ده مكانش عشان الإخوان فشلة .. دول منفسنين ع الإخوان
لما نقاد الناصرية بيكتبوا عن خطايا عبد الناصر .. ده مش عشان مصر تتقدم وتتجاوز حكم الفرد .. دول منفسنين من عبد الناصر
لما بتوع السياسة الوطنيين قالوا إن كامب ديفيد مصيبة سودا على دماغنا ودماغ اللي بلانا بيها.. ده مكانش خوف ع البلد .. دول كانوا منفسنين من السادات
وبالمناسبة كمان: الاشتراكية كلها قامت نفسنة على الرأسمالية
والديموقراطية نفسنة ع الملوك والأمراء
والعلمانية نفسنة ع الكنيسة
والفن أصلا نفسنة على الدين
أقولك؟ .. هاقولك أنا ..
أي حد عنده رؤية نقدية في الدنيا بتحطك قدام نفسك لما تكون كاتب فاسد، أو صحفي فاسد، أو إعلامي فاسد، أو بتساعد ع الفساد، أو بتكسب من ورا الطرمخة ع الفساد .. كل دول مش بيقولولك كده عشان شرفا ولا عايزين مصلحة بلدهم ولا خايفين من المسئولية ولا خايفين ييجي يوم وولادهم يقولوا عنهم اللي احنا قلناه عن الاجيال اللي سبقتنا ورضيت بالذل وتحالفت معاه وكلت عيش وأكلت ولادها من الحرام على حساب الحقيقة، ولا حتى عشان الدم اللي سال في الثورة والشهدا وشويتين القيم والمباديء والكلام اللي مبيجبش همه ده …
لا لا لا لا لا لا لا .. اوعى تصدق يا حماده .. دول بينتقدوك عشان غيرانين منك يا حمو يا حبيبي.. عشان أنت شاطر يا قلب أمك .. ومصروفك أكتر من مصروفهم .. وسندوتشاتك أكتر من سندوتشاتهم، وكرشك أكبر من كرشهم .. وعمو السيسي هيجيبلك معاه مصاصة بعد ما يقتل الارهابيين الأشرار .. دي نفسنة يا روحي .. نف سنة
- اتشليت ولا لسه؟ لسه .. تبقى منفسن ع الكلمتين الحلوين دول ومش عايز تتشل …..