البراغماتى --قصيدة للشاعره/////// فاطمه المرسى

البراغماتى
فاطمه المرسى
نصّبت نفسك ع البشر
جلاد وقاضي
انت اللي وحدك بير حكَِم
والكل فاضي
عارض بضاعتك في الهوا
والعرض عادي
اللي اشتىرى منك ندم
كل اللي باع لك باع عدم
واللي بيتفرج غرم
أعمى وعامل ليه ساعاتي
عواد عويل ساب ارضه بور
فاسه في ايده بيشتغل نباش قبور
عمره ما شاف بين السطور
وبراغماتي
شكله غريب سايق العبط
يقول يمين ويلف م الناحيه الغلط
يحلف يمين انه مايقبلش العوض
عامل عفيف
ويمد ايه يستلف تمن الرغيف
وعمره مايرد السلف
في الارض مندوب الاله
وماشي عكس الاتجاه
للمحرقه يجمع حطب
جاهل ويحف بالكتب
ويداري كذبه بالغضب
ويبيع ابوه لو بان زبون
ويدوس عليه لو جه طوفان
بمضغ لاعداؤه الزلط
ومطيباتي
عالم عليم
عنده جواب ينفع لكل الأسئله
تعلب وعايش دور اسد
وساعات حمل
والقط لابس توب جمل
ومشخصاتي
البيضه يقلبها حجر
وقت الخطر
يرمي الحبال لعنيك تبان متحركه
والعوبان
بالزور يفوز حتى في أجدع معركه
وبهلوان
يلبد بسرعه في الشقوق
وشهيته مفتوحه دايما للحقوق
عليه تدوس وماتسمعوش
عن اسمه حتى ما تسألوش
خليه يهاتي