المنسي

سلفي حضرتك ؟ ولّا شيعي
ولّا م الإخوان
مش ديني خالص
تبقى أكيد ليبرالي أو علماني
أو شيوعي من بتوع المنجلة
أو ماسوني م اللي بيقولوا عليهم
لابسين حظاظة فسفوري
وبيعبدوا الشيطان
عضو ائتلاف
ناشط في حركة
إنجز يا بركة
قول بقى
انت تبع أنهي منصّة
من منصات الميدان
انت ليه ما بتردش
يعني ولا واحد ف دول
أيوه
عرفتك تبقى مين
يا سلام
انت نعناع الجنينة والريحان
عم الشباب
عم
يا صاحب الميدان
أتاريك مستغرب المكان
صح أصلك لما سبته
كان ميدان واحد سليم
مقفول
بس أصلك لما يعني ...
قسموه
برده طلعوا ولاد أصول
مش كان أحسن ما يبيعوه
طب بإذنك
أصلي طالع ع المنصة
عندي كلمة هاقولها عنك
ثم يتلوها بيان
هابكي فيها وأقول يا ولدي
حقك هو حقنا
والمطالب ف البيان
دي عشانك
مش عاشنّا وربنا
إيه.. ماشي
بالسلامة
في رعاية الله وأمان
ابقى زورنا كل فترة
بس بلاش هنا ف الميدان
ابقي نوّر عندنا
في حزبنا
أي وقت تعالى شرّف
ده انت غالي عندنا
يا أمين
إدي "منسي" الكارت بالعنوان