أيها الإخوة فى طرة!

- خلاص يا عم، سقط رئيس العصابة.. وإعلان طرة جمهورية رئاسية!
- مبرووووك.. لا رئيس ولا وزير.. تحيا الثورة!
- هيلبسوا البدلة إياها.. وقبلهم رئيس العصابة وأنجاله!
- بس دى خبطة جامدة جداً.. حقيقى ماكنتش متوقعها بالصورة دى!
- ناقص سرور وعبيد.. وشوية فكة كمان يعنى!
- لاحظت أن سيارة الترحيلات كانت تنتظر فتحى سرور،على باب جهاز الكسب غير المشروع؟
- أيوه.. كان هوه اللى ناقص من العصابة!
- تفتكر تصرّف الداخلية استبق قرار المحقق، ونتيجة التحقيقات؟
- عاوز أريحك.. كل المستندات كانت موجودة قبل استدعائه.. والتهم ثابتة!
- طيب فرضاً كان خرج بدون حبس.. يبقى ليه كده؟
- يا دار ما دخلك شر.. ما خسرناش حاجة.. والداخلية لازم تبقى جاهزة!
- بس سرور قال أنا جاهز بمستنداتى.. وشنطة هدومى!
- يا سلام عين العقل.. عز الطلب.. حلوة عز دى!
- آه .. وبالمرة يشرّفوا جنب بعض.. موافقون موافقة!
- هتجنن إزاى كانت مصر ماشية بالعصابة دى .. على بابا والأربعين حرامى!
- مصر كلها خير.. واللى جاى خير كتير.. هنقطع إيد اللى يلمسه!
- نفسى كنت أشوف جمال وعلاء بالكلابشات.. مش شماتة ده تشفى!
- مش هاتفرق كتير.. المهم أن جيمى شرف طرة!
- خليه يعيش ويشرب.. يمكن طرة تتغير بيهم!
- ونفسى كمان أشوف البدلة اللى لابسينها.. سنييه ولّا إيه؟
- كانوا بيقولوا بدلة مبارك بتتكلف 16 ألف دولار.. وتستغرق لصنعها 3 شهور!
- يا نهار إسود.. يعنى مرتب 1000 واحد فئة 99 جنيهاً!
- وكان اسمه يكتب عليها بالإنجليزية.. فى خطوط طولية.. حسب صحيفة ديلى ميل البريطانية!
- دى لوحدها كانت كفاية لمحاكمته.. والشعب مش لاقى اللضا!
- ابسط يا عم حتى البدلة دى، ما يقدرش يلبسها تااانى!
- هيلبسها فين بقى؟.. هوه صحيح هيدخل السجن.. ولّا هيعيش فى مستشفى؟!
- برضه مش مصدق.. قلت لك الثورة موجودة، وميدان التحرير موجود!
- بصراحة كنت خايف.. وما كنتش مصدق.. يمكن كان المجلس العسكرى...؟!
- طيب ودلوقتى.. بتقول إيه وهوه قدامك.. هوه وولاده!
- أنا ماشفتش.. الكدب خيبة.. إنما اطمنت شوية!
- شوية بس؟.. المجلس العسكرى وطنى.. والنائب العام وطنى.. والثورة فى الميدان!
- يعنى مفيش صفوت الشريف.. ولا فتحى سرور.. ولا زكريا عزمى؟!
- يا سيدى بقولك ولا مبارك نفسه.. أقول تور تقول احلبوه؟!
- أنا بحلم ولّا بحلم.. اضربنى علشان أفوووق!
- لأ فووووق.. الخوف دلوقتى على أخلاق المساجين!
- عندك حق.. دى كلمة ياسمين الفخرانى!
- وبرضه ما كانش لازم يبقوا كلهم فى طرة!
- أيوه.. كان لازم يتفرق دمهم فى السجون.. القطا ووادى النطرون!
- يمكن علشان الجمهورية تكمل.. وإمكانية السيطرة عليهم فى مكان واحد!
- بس أنا خااااايف.. أحسن يتفقوا ويرتبوا أوراقهم!
- يتفقوا على إيه.. هيعملوا انقلاب يعنى؟!
- ليه لأ.. دول عصابة يا بابا!
- أموت وأشوف مبارك عامل فيها رئيس جمهورية طرة!
- ويا سلام.. لما يخطب ويقول: الإخوة والأخوات.. إخواااانى فى طرة!