مصاص الدماء مالوش عيش في مصر!

عياده طبيب
- بتشتكى من إيه!
= بص يا دكتور أنا مشكلتى غريبه شوية.. أنا vampire!
- وأنا دكتور أحمد أبو المعاطى أهلا بحضرتك بتشتكى من إيه برضه!
= مش طالبة معايا مص خالص.. بقولك أنا vampire وعاوز أتعالج!
- وأنا أحمد ألو المعاطى وأنا اللى هعالجك متقلقش!
= يا عم أنا مصاص دماء متعصبنيش!
- منا فاهم.. بس بحاول أخليك تعقل وترجع في كلامك ومتسفش عليا في آخر الليل!
= يا دكتور صدقنى أنا مصاص دماء.. متحول من شهرين كده.. وطلع أديان أهلي وعاوز أرجع طبيعى تانى!
- مش شايف ليك نابين يعنى.. ولا بتعوص.. ولا طالعلك شعر كتير وبتقول عو ولا حاجة!
= أولا اللى بيقول عو ده المستذئب وفصيلة تانيه بعيد عنى.. ثانيا أنا المفروض مبعوصش بقولك مصاص دماء مش كلب.. ثالثا النابين دول هطلعهم دلوقتى وأعضعضك.. شوفلى علاج عشان بدأت أتعصب!
- طب لو إنت مصاص دماء يعنى.. عاوز تتحول وترجع تانى ليه.. دا إنت المفروض خارق يعنى !
= ما هو حضرتك انا المفروض خارق فعلا.. والمفروض مبخرجش في أشعه الشمس بالنهار عشان متحرقش.. وبفضل نايم لحد المغرب.. عشان بفضل طول الليل بدور على حاجه أمصها !
- نعم ؟!
= أي إنسان يعنى أمص دمه.. أخش حضرتك البيت وأنام في التابوت أصحى على صوت عربيه خضار ومعلقه مكرفون وصوت عالى وقذر عمال يغنى في المكرفون بحاجات غريبه.. ويصحينى من النوم.. وأنا بقيت راجل مريض مش حمل إرهاق يعنى !وكمان لما بنزل باللبس الرسمى الناس بتتريق عليا!
- مريض مالك!
= جالى فيرس c يا عم من دمكو.. دا غير الدوالى اللى جتلى بسبب الناس اللى بقابلها!
- ناس ايه!
= يعنى من بعد ما تعبت.. بقيت مبقدرش أجرى ورا حد ولا أتشاقى زى الأول.. فبقيت بجيبها بالذوق.. أوقف واحد أقوله معلش ممكن أمص منك شوية دم عشان جعان بس.. يقولى والله يا باشا لسه متبرع الأسبوع اللى فات.. محسسنى إنى بلم تبرعات!
أوقف راجل كبير واقوله أمص منك شوية دم.. يقولى إنت المحافظ ؟!.. ايوا المحافظ بيلبس بدلة فعلا.. ومش مكفيك الدم اللى بتمصه مننا كل يوم ؟!.. ويطلع إزازة بيبس فاضيه ويكسرها في دماغى ويطلع يجرى.. حاجه قمة قلة الأدب وربنا!!
أروح لواحدة واقفة في أمان الله.. أقولها بعد إذنك يا آنسة ممكن أمص شوية دم؟!.. تقولى أنا آسفه مبكلمش ولاد!.. يا بنتى أنا مصاص دماء مش أي ولد.. تقولى ما أنا إبن خالتو ظابط وأمور ومتقدملى برضه عادى!.. أتخنق منها وأنقض عليها آجى أمص ألاقيها حاطة بدرة على رقبتها وحاجه طعمها زى الخرة وتسد النفس يعنى!
ومن ساعتها وأنا ماشي أقتل في الناس اللى بتضايقنى ومش طايق أمص دم حد منهم من القرف اللى بشوفه!
- طب خلاص هتعدى عليا بكرة الصبح وتجيلى التحاليل اللى هكتبهالك دى!
= يا عم ارحمنى بقولك فامبير.. ومبصحاش الصبح!
- يا عم إصحى بدرى اليوم ده معلش!
= يابا لو مشيت الصبح الشمس هتحرق ميتينى إفهمنى!
- يا عم النار متحرقش مؤمن.. صلى على النبى بقى!
= ناس كتير قالتلى متتعالجش في مصر.. ناولنى المفك اللى جنب إيدك ده لو سمحت!