أهلك اللي على الفيس!

أنا هحكيلكم قصة تعرفكم يعني إيه رضا الأم.... وأهمية رضا الأم
من كام شهر أنا كنت- وما زلت طبعا- شاب تافهه زي أي شاب بيدخل على الفيس بوك... يعمل شير لكلام لا يعبر عنه تماما... يغير البروفايل بيكتشر كل شويه... يحط cover فوتو دينيه... يكتب استاتس فيها خشوع وورع ويستني أي حد معدي يدوس لايك...
يدخل عند واحد صاحبه كاتب أي استاتس انجليش أو كاتب كلام عميق حبتين ل أي كاتب تافه... ويقوله الله يرحم جدك يلا..كان بياكل البقسماطه بالعرض
وفي نفس الوقت يدخل عند واحده زميلته كاتبه كلام اتفه من صاحبه...ويقولها
BEGAAAAAD O7AYEKKKKKY 3ala El SPIRIT de
أو كاتبه ستيتس المفروض انها كوميديه يعني وموقف يضحك وكده ويقولها واو فانتاستك
في حين أنه مبيبقاش كمل الستاتس للأخر عشان مستحملش الكلام
وطبعا لازم الكومنت يبقي فرانكوا والا تبقي بيئه وبلدي ومابتغسلش رجلك قبل ماتنام وعندك تينيا واهلك معرفوش يربوك
المهم في الفتره دي كان عندي نحو 700 فرند... على اتنين فرند ريكوست..من واحد اسمه " فرجه قريب " والتانيه " Ana Asln bnt Moshkla " ودول طبعا عملتلهم ايجنور عشان الأولاني كداب والتانيه بتاعه مشاكل وانا مبحبش المشاكل
المهم برضه كله مستني البوينت بتاعه رضا الام في ام الموضوع ده انا عارف
بص يا سيدي...ركزي يا اوختي.... بعد كده امي عملت اكونت على الفيس بوك الله اعلم هل عشان تتابع الاخبار أو عشان تراقب سلوكي وتشوف ابنها بيقعد تمنتاشر ساعه على ايه... المهم أول واحد عملتله "اد" كان العبد لله... طبعا انا لقيتها امي قمت عامل ايجنور وش...
يعد كده بقي كل يوم أول ماصحي من النوم الاقيها عاملالي اد تاني..وانا اعمل ايجنور..لا هي بتزهق ولا انا بزهق وكانت هي الفولور الوحيد اللي عندي ساعتها
فضلنا كده فتره لحد ما حسيت أن كده ميصحش...وقولت خلاص انا امي مينفعش اسيبها كده..دي امي برضه يا كماحه...وفعلا دخلتها عندي في الفريندس
وعشان انا ابن "بار" بأمه...حاطتها في ليست ال Restricted لوحدها عشان محدش يدايقها وعشان متعرفش تشوف أي حاجه من اللي بعملها
وفضلت كده فتره طويله... بعد كده سمعت كام محاضره للاستاذ معز مسعود عن بر الوالدين وعلي بسمتين امل لعمرو خالد وقصه الدكتور مجد ناجي مع اهله...فقولت عيب بقي ميصحش كده...وبعد كده خليت امي فرند عادي زي بقيه الاصدقاء...تشوف وتقرا انا بعمل ايه وبكتب ايه
ومن ساعتها...والفولورز بيزيدوا عندي...وبقوا من فولور واحد - اللي هو امي - إلى 17 ألف واحد
بس يا سيدي...عرفت أن رضا الام مهم ؟!
...انا بناشد الاستاذ عمرو خالد ينزل قصتي في بسمه امل عشان اكيد قصتي دي مرت على شباب كتير كانوا سايبين اهلهم في ال waiting ليست عشان جو المفتش كرومبو بتاعه ده من نوعيه
انت عملت لايك ل سوسو نونو ليه ؟! تعرفها منين ؟!
مين وليد توفيق اللي انتي عاملاله لايك ده ؟! تعرفيه منين اعترفي ؟! وطبعا لو قعدتي تقنعيها أن وليد توفيق ده المغني بتاع "انزل يا جميل ع الساحه واتمخطر هنا بالراحه "مش هتقتنع
بس برضه نرجع ونقول الحمد لله أن الانستجرام محدش من الجيل القديم ده ممكن يفهمه في يوم من الايام