عارف جوازة أحمد زكي الله يرحمه كلفته كام؟!

-طلباتك يا عمي؟!
=والله يا بني احنا بنشتري راجل
-طلباتك يا عمي!!
=مفيش طلبات محدده صدقني...انت زي ابني وانا مقدر ظروفك
-طلباتك ياعمي
=مُصٍر يعني!!
-اه
=خلاص يا بني من غير حرج وتتقيل عليك.. هي شقه 4 أوَض ورسيبشن 3 قطع.. ويا ريت لو تبقى دور أرضي بجنينه..عشان في العيد بحب أشوي ومابالاقيش مكان أشوي فيه.
وبالنسبه للعفش.. انت عليك الخشب كله...والمطبخ... واحنا علينا الأجهزة الكهربائية.
انت هتجيب الستاير... معروف في أي حته أن الستاير على العريس...ربنا يسترك يعني.
واحنا هنجيب السجاد.
اه نسيت اقول لك التليفزيون مش ضمن الأجهزة الكهربائية...عشان ده بيعتبر من الرفاهيات... وكمان غساله الاطباق... دي عليك انا بنتي بتقرف تغسل الصلصه بعد مابتنشف في الطبق
-التليفزيون من الرفاهيات !!
=اما بقي الخطوبه علينا احنا هنعملها هنا عندنا في البيت انت شايف الصاله كبيره وتشيل من الحبايب 50...وابن خالتها عنده فراشة هينزلنا 50 كرسي...وابن عمتها عنده عربيه كبده هو هيبقي المسئول عن الكاترينج في الخطوبة...اما بقي الفرح عليك...بس أهم حاجه الفرح تعمل حسابك أن عيلتنا كبيرة واصحابي ومعارفي كتير...ياريت القاعه تبقي 250 رأس في أي فندق فايف ستارز مش هزنقك واقولك اسم اوتيل بعينه...بس انت وذوقك
فستانها عليك...الكوافير عليك...الميك اب ارتيست عليك... الفوتوجرافر عليك... وعيب عليك هاهاهاهاها
ها نقرا الفاتحه ؟!
**بيطلع محفظته.... وبيطلع منها صورتين
-عارف مين دول ياعمي ؟!
=اه اللي على الشمال دي بكيزه بنتي... لكن مين القمر اللي على اليمين دي !!
-دي "أولجا" مرات أحمد زكي في فيلم النمر الأسود..
عارف جواز أحمد زكي من المزه دي كلفه قد ايه ؟!
=قد ايه ؟!
-سبوره خشب... وصباعين طباشير... وقالتله "بهبك موهمد"
=مش فاهم قصدك ؟!
-هما 15 ألف
=مش قليل ؟!
-لا
- يبقي نقرا الفاتحة